Feijóo anuncia a apertura do período de matrícula nas escolas infantís para o primeiro curso no que serán gratuítas para todos os nenos

O titular do Goberno galego, Alberto Núñez Feijóo, destacou hoxe a publicación no Diario Oficial de Galicia do formulario para solicitar praza nunha escola infantil da Xunta para o vindeiro curso, o primeiro no que serán 100% gratuítas para todos os nenos; “converténdonos así, na primeira comunidade autónoma cunha educación infantil universal”, precisou.

Durante unha visita á escola infantil Santa Susana, Feijóo salientou que, nun momento no que os fogares teñen que asumir novos sacrificios, “en Galicia, a educación infantil custa cero euros”, dixo, ao tempo que destacou que esta iniciativa conta cun investimento de 30 millóns de euros, para beneficiar a máis de 30.000 familias.

Logo de facer fincapé en que con esta medida, a Comunidade convértese na única na que un neno pode pasar por todas as fases do ensino, desde infantil ata o bacharelato, sen que os pais teñan que desembolsar nin un só euro, o titular da Xunta afirmou que o Goberno galego seguirá comprometido cunha terra con máis oportunidades, con máis servizos e con máis axudas para as familias.

Así, a Administración autonómica galega está a levar, por exemplo, unha atención 100% gratuíta aos concellos máis pequenos, co obxectivo de rematar o 2022 con máis dun centenar de casas niño; e foi a primeira en poñer en marcha unha Lei de impulso demográfico que garante, ao máximo nivel normativo, o acceso á educación infantil para todos os nenos.

O presidente do Executivo galego lembrou que este fito é posible grazas aos traballadores públicos da Xunta, que fan posible que as familias non teñan que facer ningún trámite adicional para acceder á gratuidade; ás entidades e empresas que xestionan escolas infantís, que no 99% dos casos accederon a implantar a gratuidade; e, tamén, aos concellos, que teñen a oportunidade de ofrecer a gratuidade nas escolas da súa competencia, a cambio de que a Xunta asuma o 100% do prezo que antes pagaban as familias e sen ningún custe extra para as arcas municipais.

O presidente galego concluíu pedindo novamente ao Goberno de España que cofinancie a gratuidade da educación infantil, tal e como comprometeu ao comezo da lexislatura.