A Xunta impulsa unha normativa específica para regular e ofrecer as máximas garantías á compostaxe comunitaria

Galicia contará cunha norma propia, impulsada pola Xunta, que regule e ofreza as máximas garantías a todas aquelas iniciativas de compostaxe comunitaria que se desenvolvan na Comunidade.

A compostaxe comunitaria é aquela xestión dos residuos orgánicos domésticos, producidos nos fogares, restaurantes ou servizos de restauración colectiva, tratados nunha instalación común —creada para o efecto—, coa que se pretende acadar un recurso para empregalo como fertilizante ou substrato de cultivo.

A Consellería de Medio Ambiente, Territorio e Vivenda publicou no portal de transparencia a consulta pública previa do Decreto polo que se desenvolverá o réxime xurídico das actividades de compostaxe comunitaria, para que durante un período dun mes todos os interesados podan trasladar as súa achegas.

Con esta normativa específica quérese reforzar a confianza e seguridade xurídica nas posibilidades que ofrece esta actividade, para impulsar a súa implantación mediante a difusión das súas características, requirimentos e potencialidades.

O decreto recollerá as condicións técnicas das instalacións e actividades de compostaxe comunitaria que, co fin de promover a súa práctica, contribúan a lograr un elevado nivel de protección ambiental e cuxo resultado responda a uns estándares de alta calidade.

Tamén determinará aqueles casos de compostaxe comunitaria que só deberán someterse ao réxime de comunicación —por cumprir os condicionantes ou previsións contidas na nova norma e en base as súas características e mínimas afeccións ao ambiente—, e que se diferenzan doutras actividades consideradas de tratamento de residuos e, polo tanto, sometidas a autorización.

Cómpre lembrar que, conforme ás directrices nesta materia establecidas pola Unión Europea, os concellos teñen de prazo ata o 31 de decembro de 2023 para implantar a recollida selectiva da materia orgánica contida nos residuos urbanos. Non obstante, esta normativa non será aplicable á compostaxe, que se considera unha operación de prevención de residuos.

Así, a futura normativa facilitará ás entidades locais un marco xurídico actualizado, e en sintonía coa Lei 6/2021, do 17 de febreiro, de residuos e solos contaminados de Galicia, para acadar os obxectivos de preparación para a reutilización e reciclado impostos pola normativa comunitaria, no que atinxe aos biorresiduos.

Este tipo de instalacións completarán o traballo que xa realiza a rede de composteiros de Sogama, formada na actualidade por máis de 18.000 —con capacidade para 390-400 litros e fabricados con materiais reciclados e reciclables—, presentes en 222 concellos, 179 centros educativos e 29 colectivos sociais.