A Xunta adxudica por máis de 205.000 € as obras de construción dun novo muro de protección na marxe do río Mero en Ponte Peiraio, no concello de Cambre

A Consellería de Infraestruturas e Mobilidade, a través de Augas de Galicia, adxudicou por 205.376 euros as obras de construción dun novo muro de protección na marxe do río Mero en Ponte Peiraio, no concello de Cambre.

O contrato foi adxudicado á empresa Ovisa Pavimentos y Obras, S.L. e conta cun prazo de execución de 6 meses para a realización dos traballos.

Trátase de executar as actuacións necesarias para protexer o noiro de sostemento da senda fluvial de Ponte Peiraio, sobre a marxe esquerda da canle do río Mero.

Os traballos obxecto das obras contratadas pola Xunta teñen por obxectivo a reconstrución do citado muro, protexendo o noiro e detendo a perda de material do terreo. Ademais, acondicionarase a senda fluvial, na que se reporá o pavimento con zahorra artificial.

A execución do muro levarase a cabo por bataches, atacándose o baleirado e construción de muro de dique por nichos alternos, de 2 metros de lonxitude máxima, de xeito que o material non escavado ou muro xa executado exerzan de contraforte para o sostemento do terreo.

Con esta intervención, de Augas de Galicia, como organismo de conca con competencias na xestión do risco de inundacións na Demarcación Hidrográfica Galicia-Costa, actúa para previr e paliar os efectos deste tipo de episodios.

Cómpre lembrar que os servizos de conservación fluvial de Augas de Galicia levaron a cabo distintas actuacións de reforzo e mantemento neste mesmo noiro, tras verse afectado polas sucesivas frontes de choivas acontecidas en decembro do 2019.

O departamento que preside Ethel Vázquez segue a colaborar co Concello de Cambre, con quen ten asinado desde o ano 2020 un convenio de colaboración para o mantemento da contorna do río Mero, cun investimento autonómico de case 160.000 euros. O acordo ten efectos ata o 31 de decembro de 2023.