A Xunta aposta por aproveitar os fondos Next Generation para seguir a impulsar a dixitalización das pemes galegas

O director do Igape, Fernando Guldrís, participou esta mañá na Coruña, no club empresarial Nordés, na xornada Fondos Europeos Next Generation: unha oportunidade para a dixitalización das pemes, na que puxo en valor a importancia de aproveitar estes fondos de recuperación para impulsar a transformación económica e social.

Neste sentido, Guldrís destacou que a Xunta leva tempo traballando en distintas propostas que considera que deben ser impulsadas mediante os Next Generation; fondos que, como lembrou, se canalizarán en gran parte a través dos Proxectos Estratéxicos para a Recuperación e Transformación Económica (Pertes), que contan cunha “visión integral da cadea de valor, un importante impacto transformador e unha gran capacidade de arrastre”.

Neste sentido, o director do Igape, dependente da Vicepresidencia segunda e Consellería de Economía, Empresa e Innovación, defendeu que Galicia aspira a impulsar proxectos transformadores da industria que contribúan, tamén, ao impulso tecnolóxico das pemes galegas. É o caso dos Pertes vinculados ao vehículo eléctrico e conectado; a saúde de vangarda; as enerxías renovables, hidróxeno renovable e almacenamento; ou o da cadea agroalimentaria intelixente e sostible.

Para acadar este obxectivo, o Goberno galego, entre outras accións, activou distintas oficinas técnicas sectoriais con diferentes clústeres galegos na procura de traballar en posibles candidaturas. Na actualidade están constituídas tres destas oficinas: unha con Ceaga centrada no Perte da automoción; outra co Clúster Saúde de Galicia, pendente do Perte de saúde de vangarda; e a terceira con Clusaga, enmarcada no vencellado á industria agroalimentaria.

Así mesmo, o director do Igape explicou que a Xunta vén desenvolvendo distintas liñas de actuación encamiñadas a facilitar a dixitalización das pemes galegas. Entre os programas activados con esta finalidade destacou o Galicia Exporta Dixital, que ten aberta unha nova edición cun orzamento de 4,4 millóns de euros co obxectivo de apoiar a expansión internacional de empresas e autónomos; ou o Cheque Dixital, cuxa última edición sumou preto de 4 millóns facilitando proxectos que teñen como obxectivo a implementación de tecnoloxías dixitais.

Son iniciativas ás que, como sinalou, cabe engadir a posta en marcha dunha nova edición do programa ReAcciona, cun orzamento de 3,2 millóns de euros e con convocatorias abertas ata abril deste mesmo ano.

“O noso obxectivo é poñer a disposición das nosas empresas as ferramentas necesarias para dar resposta ás novas necesidades, pero tamén para aproveitar os novos retos e oportunidades. Estas deben vir da man dos fondos Next Generation para acometer proxectos transformadores no noso modelo produtivo, para o que debemos anticiparnos e estar preparados para aproveitalas ao máximo”, concluíu Guldrís.