A Xunta publica no Diario Oficial de Galicia o cambio de titularidade a prol do concello de Abadín de dous treitos antigos da LU-113 nas parroquias de Corvite e de Abeledo
Transfírese un resto de 697 metros na marxe esquerda da actual vía autonómica, no lugar da Laxe; e outro antigo treito de 415 metros, tamén na marxe esquerda, no lugar de Sabugos
A entidade local terá competencia para actuar nestes treitos e asumirá a responsabilidade da súa conservación e mantemento
A Xunta publica hoxe no Diario Oficial de Galicia (DOG) a transferencia a prol do Concello de Abadín de dous treitos antigos da estrada LU-113, ao seu paso polas parroquias de Corvite e de Abeledo.
No seguinte enlace ao DOG pódese ampliar a información relativa a esta transferencia, aprobada na reunión do Consello da Xunta do pasado día 17 de febreiro: https://bit.ly/3Hvzvvg
A entidade local solicitou ao departamento de Infraestruturas da Xunta a cesión destes restos antigos da vía autonómica que conta cun tráfico totalmente local, tras terse acometido a obra de acondicionamento da LU-113 no treito entre Moncelos e Abadín.
O primeiro destes treitos atópase no lugar da Laxe, na parroquia de Corvite, e ten unha lonxitude aproximada de 697 metros, pola marxe esquerda da actual vía autonómica. O outro treito antigo, tamén na marxe esquerda da estrada, atópase no lugar de Sabugos, na parroquia de Abeledo, e ten unha lonxitude aproximada de 415 metros.
A Consellería de Infraestruturas e Mobilidade, de acordo cos informes emitidos polos servizos da Axencia Galega de Infraestruturas, formula a proposta favorable de transferencia destes restos situados nas marxes da actual estrada LU-113.
A transferencia a prol do Concello de Abadín tramítase de acordo co previsto na Lei 8/2013, do 28 de xuño, de estradas de Galicia, que establece a súa aprobación por decreto da Xunta, a proposta da Consellería competente en materia de estradas, e logo do acordo entre as administracións implicadas.
Co cambio de titularidade, o Concello terá a competencia para actuar neses treitos e asume a responsabilidade da súa conservación e mantemento.
O Decreto producirá efectos desde o día seguinte ao da súa publicación hoxe no Diario Oficial de Galicia.