O Sergas publica as puntuacións provisionais do primeiro proceso de xeración de listas de nomeamentos temporais como técnico de saúde de atención primaria

O Diario Oficial de Galicia publica, na súa edición de hoxe, a relación provisional de admitidos e excluidos e os resultados provisionais de baremación correspondentes ao primeiro proceso de xeración de listas para a formalización de nomeamentos estatutarios temporais de técnico de saúde de atención primaria.

Xeráronse un total de 140 inscricións, resultando excluídas só o 8,57% das solicitudes de participación.

As listas atópanse publicadas, a disposición das persoas interesadas, na páxina web do Servizo Galego de Saúde (www.sergas.es), no apartado Emprego Público-Listaxes de persoal estatutario. Ademais, o estado de cada solicitude pode ser consultado polo aspirante no seu expediente electrónico persoal en Fides/expedient-e/sección de procesos.

A incorporación de persoal médico técnico de saúde xunto coa creación da categoría de facultativo especialista de atención primaria, recollidas ambas medidas na Lei 18/2021, de 27 de decembro, de medidas fiscais e administrativas, teñen como obxectivo dar resposta adecuada ás necesidades actuais da atención primaria, garantindo a continuidade asistencial con criterios de calidade, nun contexto de crise sanitaria como o actual e de dificultades excepcionais relacionadas coa escaseza de profesionais de médicos de familia.

Como anticipación á publicación das listas baremadas e segundo a orde de chamamento consensuada coas organizacións sindicais, que se recolle no vixente Pacto sobre selección de persoal estatutario temporal, desde o 21 de febreiro xa están a prestar apoio aos médicos do primeiro nivel asistencial, inicialmente, 14 profesionais desta categoría.

Todos eles están a desenvolver o seu labor de forma centralizada nas instalacións do Centro de Atención Integral ás Emerxencias, no Concello de A Estrada, en quendas de mañá e tarde, o que permite dar soporte ao conxunto de profesionais dos centros de saúde.

Dentro das actividades que realizan estes técnicos están as de seguimento dos pacientes covid positivos, a tramitación das altas e baixas das persoas asintomáticas e a atención telefónica para responder a demandas de información relacionadas co coronavirus.

Tamén colaboran no seguimento dos pacientes positivos covid mediante a plataforma tecnolóxica Telea, informan dos resultados das súas probas covid, realizan o seguimento de pacientes en incapacidade temporal por outras continxencias comúns, renovan receitas para tratamentos crónicos e realizan informes médicos autorizados, entre outras tarefas.

Para iso dispoñen dun listado de traballo diario e dan soporte ao conxunto dos profesionais de atención primaria en determinados procedementos que teñan unha importante carga burocrática. A súa centralización permitirá que este recurso poida ser dirixido a aqueles cupos onde máis se necesite.

Próximas publicacións

Proximamente, publicaranse as puntuacións provisionais no proceso de actualización de listas das seguintes categorías: celador, celador quenda discapacidade intelectual, cociñeiro, grupo auxiliar da función administrativa, persoal de servizo xerais, pinche, técnico en farmacia, técnico superior en anatomía patolóxica e citoloxía, técnico superior en dietética, técnico superior en documentación sanitaria, técnico superior en hixiene bucodental, técnico superior en imaxe para o diagnóstico, técnico superior en laboratorio de diagnóstico clínico e técnico superior en radioterapia.