A Xunta adxudica por preto de 195.000 € as obras da sendas peonís de Vilar de Cas e Güimil e da mellora da contorna do santuario de Couso de Salas, en Muiños
Habilitaranse 3 treitos de sendas pola marxe dereita da estrada OU-302 en Vilar de Cas, que suman 450 metros de lonxitude, e outros 100 metros no lugar de Güimil, para facilitar os desprazamentos entre o centro sociocultural e as vivendas da zona
A Consellería de Infraestruturas e Mobilidade prevé comezar a execución das obras en primavera co obxectivo de rematalas en outono para facilitar desprazamentos máis seguros aos veciños
Prevese tamén mellorar a accesibilidade, a reposición de beirarrúas e a colocación dunha marquesiña na contorna do santuario, así como a execución dun pequeno muro de contención e a reparación dunha cuneta deteriorada no lugar de Souto de Limia
O departamento que dirixe Ethel Vázquez mantén a súa aposta polos concellos do rural contribuíndo, con investimentos coma este, a mellorar os servizos aos veciños
A Consellería de Infraestruturas e Mobilidade vén de adxudicar por 193.492,61 euros as obras de execución das sendas peonís en Vilar de Cas e Güimil e da mellora da contorna do santuario de Couso de Salas, no concello de Muíños
Este contrato foi adxudicado á empresa Hordescon, S.L, e o obxectivo da Xunta é iniciar as obras a comezos da primavera para que poidan estar rematadas neste outono, pois teñen un prazo de execución de seis meses.
Esta intervención persegue poñer á disposición dos veciños un total de 560 metros de novos itinerarios que lles permitan desprazarse dun xeito máis cómodo e seguro.
A actuación proxectada en Vilar de Cas suporá habilitar 3 treitos de sendas pola marxe dereita da estrada, que suman 450 metros de lonxitude, incluíndo, tamén, a drenaxe para a condución das augas pluviais e da rede de sumidoiros.
Igualmente, actuarase na marxe dereita da OU-302 no lugar de Güimil, executando outros 100 metros de senda para facilitar os desprazamentos entre o centro sociocultural e as vivendas da zona.
Ademais mellorarase a accesibilidade na contorna do santuario de Couso de Salas, coa reposición de beirarrúas e coa colocación dunha marquesiña na parada de autobús. A ese respecto, aínda que neste núcleo existen beirarrúas cun ancho aproximado de 1,5 metros, está previsto mellorar a súa accesibilidade e reparar as baldosas e os bordos deteriorados, ademais de dotar de pavimento podotáctil as ramplas e os vaos dos pasos peonís.
Tamén se actuará no lugar de Souto de Limia, respondendo a unha necesidade detectada polos técnicos da Axencia Galega de Infraestruturas, coa execución dun pequeno muro de contención e a reparación dunha cuneta deteriorada.
O departamento que dirixe Ethel Vázquez mantén a súa aposta polos concellos do rural contribuíndo, con investimentos coma este, a mellorar os servizos aos veciños.
A Xunta financiará estas obras con fondos do eixe React-UE do Programa Operativo FEDER Galicia 2014-2020, como parte da resposta da UE á covid-19.