A Xunta construirá unha senda na estrada autonómica AC-421 entre Valenza e Castrobó, no concello de Coristanco
Este contrato, adxudicado por un importe de máis de 30.000, comezará nas vindeiras semanas
O obxectivo é mellorar a accesibilidade dos veciños do núcleo de Valenza, onde viven persoas con mobilidade reducida, que a día de hoxe teñen difícil o acceso ao centro urbano de Castrobó, onde se atopan os servizos principais da zona
A Consellería de Infraestruturas e Mobilidade adxudicou as obras de construción dunha senda na estrada AC-421, entre Valenza e Castrobó, no concello de Coristanco.
Este contrato foi adxudicado á empresa Eulogio Viñal Obras y Construcciones, S.A. por un importe de máis de 30.000 €. As obras comezarán nas vindeiras semanas.
Con esta actuación, deseñada polo departamento de Infraestruturas da Xunta, búscase mellorar a accesibilidade dos veciños do núcleo urbano de Valenza, onde viven persoas con mobilidade reducida que a día de hoxe teñen difícil o acceso ao centro urbano de Castrobó, onde se atopan os servizos principais da zona.
A intervención permitirá configurar un espazo para o tránsito seguro de peóns con zonas reservadas ao longo do treito situado entre os puntos quilométricos 5+440 e 5+630 da estrada AC-421. A senda enlazará coa beirarrúa actual na marxe esquerda da estrada a partir do punto quilométrico 5+630.
A execución do novo itinerario peonil comezará polos traballos de limpeza, despexe, roza e escavación do terreo, para posteriormente habilitar a senda con bordo e o estendido de formigón coloreado.
Na intervención inclúese a mellora da rede de pluviais con rígola prefabricada de formigón e bordo e paso salvacunetas.
O departamento que dirixe Ethel Vázquez continúa mellorando a rede viaria autonómica para favorecer os desprazamentos a pé de modo máis seguro e sustentable.