Galicia recibirá 224,5 millóns de euros pola sentenza do IVE de decembro de 2017

Galicia recibirá 224,5 millóns de euros pola sentenza do IVE correspondente ao mes de decembro de 2017. O Boletín Oficial do Estado (BOE) publica hoxe unha orde do Ministerio de Hacienda e Función Pública co importe a aboar a cada comunidade autónoma, o que vén a concretar o cumprimento da sentenza para Galicia.

A cantidade a aboar a Galicia por esta sentenza ascende a 211 millóns de euros máis os xuros de demora, o que coincide cos cálculos realizados polo Goberno galego. Dos 185 millóns de euros que o Goberno central terá que aboar ás comunidades autónomas e concepto de xuros de demora, a Galicia correspóndenlle uns 14 millóns.

Galicia tiña razón

A sentenza 553/2021, do 23 de abril do Tribunal Supremo deu a razón a Galicia na súa reclamación da mensualidade do IVE correspondente ao mes de decembro de 2017 e recoñeceu o dereito a que a Comunidade fora compensada por esa mensualidade que non ingresou o Executivo central e a pagarlle os xuros de demora.

Dita resolución xudicial acreditou que o Goberno central vulnerou o dereito á autonomía financeira da Comunidade galega, que esa actuación orixinou un quebranto económico á facenda autonómica, e que dese xeito se produciu un enriquecemento indebido para a Administración do Estado.

A Xunta actuou sempre coa máxima lealdade institucional e por iso Galicia foi a primeira Comunidade en advertir desta situación en xullo de 2018 e reclamar a mensualidade correspondente ao IVE de 2017 que o Goberno central tiña que ter transferido no ano 2019 en cumprimento do sistema de financiamento autonómico.

O Executivo galego reclamou de maneira reiterada ao Goberno central que fixese este abono, tal e como acreditan os feitos probados na sentenza. Neste sentido, a Xunta esixiu en varias ocasións unha solución nos Consejos de Política Fiscal y Financiera (CPFF).
Ademais, elaborou informes xurídicos que facilitaban unha solución; esixiu coñecer os informes xurídicos nos que o Estado apoiaba a súa posición e aportoulle os seus; mesmo redactou unha proposta normativa para solucionar esta cuestión que foi remitida ao Goberno e que non foi tomada en consideración; e tamén impulsou a aprobación de resolucións no Parlamento de Galicia en apoio a esta reclamación.

En definitiva, Galicia liderou primeiro a reclamación xusta do IVE adebedado e liderou tamén a solución. Deste xeito, estes recursos retidos polo Executivo central poderanse transferir a todas a comunidades, acudisen ou non aos tribunais.