Política Social analiza con Cruz Vermella novas liñas de colaboración centradas na formación dos profesionais sociosanitarios

O director xeral de Atención Integral Socio-Sanitaria, Antón Acevedo, mantivo unha reunión coa presidenta de Cruz Vermella, Carmen Colmeiro, para estudar novas liñas de colaboración centradas na formación dos profesionais sociosanitarios. A Consellería de Política Social está a traballar neste eido a través do Plan de Formación Continuada, dirixido a máis de 10.000 profesionais e conformado por 300 actividades e máis de 6000 horas.

Este plan, que se puxo en marcha o pasado mes de novembro, permite atender as dúbidas e formar os profesionais dos diferentes centros nas técnicas máis avanzadas. Deste xeito, os contidos destas sesións formativas comprenden desde novidades normativas ata aspectos máis tecnolóxicos ou sociais.

Teleasistencia

O director xeral de Atención Integral Sociosanitaria salientou, ademais, durante o encontro, o traballo que está a realizar Cruz Vermella no ámbito da atención ás persoas maiores a través de programas como o da Teleasistencia, que conta co apoio económico da Xunta de Galicia.

Neste sentido, Antón Acevedo sinalou que a teleasistencia é un recurso fundamental para axudar aos maiores no seu día a día, pois con soamente premer un botón teñen ao seu alcance a atención que precisan. A aposta por este programa enmárcase no impulso que o Executivo autonómico está a dar a prestacións públicas que fan posible que as persoas poidan elixir libremente onde e como queren envellecer, como son o Servizo de Axuda no Fogar (SAF), o Xantar na casa, ou as Casas do maior, entre outras.