A Conselleira de Saúde do Goberno vasco visita Galicia para compartir experiencias cos responsables sanitarios da Xunta

Unha delegación da Consellería de Saúde do País Vasco, encabezada pola conselleira desta comunidade, Gotzone Sagardui, acompañada pola directora xeral do Servizo Vasco de Saúde, Rosa Pérez, visitan hoxe a nosa Comunidade Autónoma para compartir experiencias cos responsables sanitarios da Xunta de Galicia.

A primeira hora da mañá os responsables do País Vasco mantiveron, no Edificio Administrativo do Sergas, unha xuntanza co conselleiro de Sanidade, Julio García Comesaña, e o resto do equipo directivo do departamento sanitario galego, para, posteriormente, reunirse co presidente da Xunta de Galicia, Alberto Núñez Feijóo.
 

Logo das reunións mantidas co presidente do Executivo galego e co equipo directivo da Consellería de Sanidade e do Sergas, os representantes vascos visitarán, na súa estadía en Galicia, diversas infraestruturas sanitarias da nosa Comunidade.