A Xunta remata as obras de mellora e posta en marcha da depuradora de Vilaverde, no concello de Coristanco
A Consellería de Infraestruturas, a través de Augas de Galicia, destinou preto de 50.000 euros para recuperar e pór en marcha a planta de tratamento de augas residuais neste núcleo do municipio, que deixou de funcionar tras un acto vandálico
Substituíronse a totalidade dos elementos avariados, actuouse na impulsión de cabeceira e modificáronse as instalacións eléctricas e autómata dos novos equipos
Este apoio ao Concello súmase aos traballos da Xunta de redacción do proxecto construtivo para mellorar o abastecemento do municipio
O departamento que preside Ethel Vázquez mantén a súa vontade de cooperar cos concellos para a mellor prestación dos servizos de abastecemento e de saneamento de auga á poboación, que son de competencia local
A Consellería de Infraestruturas e Mobilidade, a través de Augas de Galicia, rematou as obras de mellora e posta en marcha da estación depuradora de Vilaverde, no concello de Coristanco.
A intervención, cun investimento autonómico de preto de 50.000 euros, permite a recuperación do funcionamento da planta de tratamento de augas residuais do núcleo de Vilaverde, que deixou de funcionar tras sufrir un acto de vandalismo.
Cómpre lembrar que esta depuradora foi executada por Augas de Galicia no marco do contrato de execución dos colectores xerais e depuradora de Vilaverde, que foron entregados ao Concello en 2017.
As novas obras agora rematadas permitiron a substitución da totalidade dos elementos avariados; así como a mellora da impulsión de cabeceira con bombas de funcionalidades pre-programada, para adaptarse automaticamente ao entorno cambiante das augas residuais. Tamén se procedeu á instalación de dúas novas bombas e modificáronse as instalacións eléctricas e autómata dos novos equipos.
Esta semana a entidade hidráulica da Xunta fixo efectiva a entrega o Concello das actuacións realizadas, tras concluírse o período de 1 mes de proba da súa posta en marcha, estipulado no contrato de execución das obras.
Esta nova colaboración co Concello súmase aos traballos da Xunta para a redacción do proxecto construtivo de mellora do sistema de abastecemento no concello de Coristanco, cun investimento de máis de 18.000 euros.
Neste caso, trátase de deseñar as actuacións precisas para a reforma da estación de tratamento de auga potable municipal, en funcionamento desde hai preto de 34 anos, que presenta deficiencias e precisa adaptar o seu funcionamento para o cumprimento dos estándares actuais.
Con este contrato, Augas de Galicia quere dar resposta á solicitude de colaboración do Concello para solucionar as deficiencias das instalación de tratamento de auga potable situada no lugar de Carrizal, que está xerando interrupcións e outros inconvenientes que restan calidade ao servizo de auga para o consumo dos veciños.
O departamento que preside Ethel Vázquez mantén a súa vontade de cooperar cos concellos para a mellor prestación dos servizos municipais de abastecemento e de saneamento de auga á poboación, que son de competencia local.