O centro de saúde de Monforte resolve o 99% das chamadas perdidas no mesmo día e en menos de 44 minutos grazas á plataforma tecnolóxica CRM100

O xerente do Servizo Galego de Saúde, José Flores, visitou esta mañá o centro de saúde de Monforte de Lemos, no que está instalada a plataforma tecnolóxica CRM100, o sistema de xestión da relación co paciente. Unha solución innovadora que, no marco do proxecto europeo Código 100, a consellería de Sanidade puxo en marcha, desde comezos do ano pasado, en 40 centros de saúde de toda Galicia.

Tal e como salientou o xerente do Sergas, este aplicativo incorpora un servizo de atención telefónica personalizada que “permite resolver o 100% das chamadas perdidas nun mesmo día e cun tempo máximo de resposta de dúas horas”. No caso concreto de Monforte, desde a entrada en funcionamento, o pasado 30 de xuño, o centro de saúde recibiu, a través do CRM100, máis de 5.855 chamadas –unha media de 37 chamadas ao día-, cun tempo medio de resposta inferior aos 44 minutos. O 99% dos casos resólvense no día; unha cifra que desprende os moi bos resultados destes máis de sete meses de actividade do sistema no centro.

Acompañado da directora xeral de Planificación e Reforma Sanitaria da Consellería de Sanidade, Estrella López-Pardo; do delegado territorial da Xunta de Galicia na provincia de Lugo, Javier Arias Fouz; e o xerente da área sanitaria de Lugo, A Mariña e Monforte de Lemos, Ramón Ares; José Flores apuntou que, a partir de mediados deste mes, este sistema incorporarase a outros 20 centros de saúde máis. O obxectivo, engadiu, é despregar, ao longo deste 2022, esta plataforma tecnolóxica a toda Galicia.

Un sistema clave na xestión da pandemia

Segundo afondou, este aplicativo permite xestionar, mellorar e avaliar a interacción entre a cidadanía e os profesionais sanitarios; aproveitando todas as canles dixitais e as aplicacións TIC que Galicia ten despregadas no ámbito da saúde, apuntou o xerente do Sergas, quen salientou, ademais, o papel clave que está tendo na xestión da pandemia.

Así, referiuse a que as funcións automáticas que inclúe esta plataforma permitiron optimizar a monitorización dos pacientes con covid-19 e dos seus contactos estreitos; o envío das enquisas para estudar os síntomas da covid-19 persistente; a citación dos procesos masivos de vacinación; ou o lanzamento de campañas de comunicación masivas para actualizar datos ou dar de alta na plataforma É-Saúde.

Compromiso coa atención primaria

Por outra banda, aproveitou para destacar o esforzo inversor da Xunta de Galicia nesta área sanitaria, en canto a “máis investimentos, máis servizos, máis persoal” e máis e mellores infraestruturas. Neste senso, recordou que, ao abeiro do Plan galego de atención primaria 2019-2021, esta área sanitaria incrementou o seu persoal con 24 profesionais máis nas categorías de médicos de familia, enfermería, fisioterapia e traballador social; quedando aínda por cubrir 8 novas prazas para acadar así o total de 32 prazas previstas no plan para esta área sanitaria.

Asemade, o Goberno galego destinou, tamén o pasado ano, 21.795 euros a obras de mellora na rede de saneamento, na substitución de varandas, nos revestimentos interiores e nos exteriores do patio do centro de saúde. Igualmente, investiu máis de 100.000 euros á renovación de equipamento de todo o distrito sanitario de Monforte de Lemos. En concreto, para o centro de saúde deste municipio, incorporáronse 2 novos desfibriladores, 2 novos electrocardiógrafos e un novo holter.