A Xunta publica no Diario Oficial de Galicia o cambio de titularidade a prol do concello de Mugardos da estrada AC-132, que comunica A Gallada e O Seixo

A Xunta publica hoxe no Diario Oficial de Galicia (DOG) a transferencia a prol do Concello de Mugardos da estrada que comunica A Gallada e O Seixo, a AC-132.
No seguinte enlace ao DOG pódese ampliar a información relativa a esta transferencia, aprobada na reunión do Consello da Xunta do pasado día 20 de xaneiro: https://bit.ly/3AO9qpr
O Concello de Mugardos solicitou á Axencia Galega de Infraestruturas o cambio de titularidade da estrada autonómica AC-132 na súa totalidade como paso previo para modificar o ancho das beirarrúas e dotar de accesibilidade o tránsito dos peóns.
A estrada AC-132 é unha vía convencional, cunha lonxitude de 2,19 km, que está categorizada funcionalmente como local polo Catálogo da Rede Autonómica de Estradas de Galicia.
A vía discorre na súa totalidade polo concello de Mugardos e atravesa solos clasificados como urbanos polo instrumento de planeamento urbanístico vixente.
A departamento que dirixe Ethel Vázquez, vistos os informes emitidos polos servizos da Axencia Galega de Infraestruturas, formulou a proposta favorable á transferencia de titularidade da estrada AC-132 na súa totalidade.
A transferencia a prol do Concello de Mugardos tramítase de acordo co previsto na Lei 8/2013, do 28 de xuño, de estradas de Galicia, que establece a súa aprobación mediante decreto da Xunta de Galicia por proposta da Consellería de Infraestruturas e Mobilidade, como competente en materia de estradas, e logo do acordo entre as administracións implicadas.
O cambio de titularidade será efectivo desde mañá. A partir da entrega, o Concello de Mugardos terá a competencia para actuar nestes treitos e asume a responsabilidade da súa conservación e mantemento.