A Xunta abre mañá o prazo para inscribirse na convocatoria de oposicións docentes deste ano
Os aspirantes teñen ata o 21 de febreiro para apuntarse ás probas, que se celebran a partir do 18 de xuño
Convócanse todas as prazas aprobadas nas ofertas de 2021 e 2022, agás as 144 que dependen da publicación por parte do Ministerio da nova lei de FP
Os exames desenvolveranse segundo o sistema habitual, ofrecendo certezas ás persoas que levan anos preparando estas probas
A Xunta publica hoxe no Diario Oficial de Galicia a convocatoria das oposicións de educación para este ano, na que se acumulan as prazas das ofertas públicas de emprego docente de 2021 e 2022. Convócanse todas as prazas, agás as que dependen da publicación por parte do Ministerio da nova lei de Formación Profesional.
O prazo de presentación de solicitudes ábrese mañá, día 1, ata o 21 de febreiro. Presentaranse obrigatoriamente por medios electrónicos a través do formulario normalizado accesible na sede electrónica da Xunta de Galicia. Así mesmo, deberá procederse ao pagamento da taxa vixente no momento da presentación electrónica da solicitude.
Deste xeito, a partir do 18 de xuño celebraranse as probas para un total de 2.484 prazas.
Delas, 2.174 serán de novo ingreso, coa seguinte distribución:
Corpo | Prazas | Número de especialidades |
Mestres | 950 | 8 |
Profesores de ensino secundario | 1.171 | 29 |
Profesores de escolas oficiais de idiomas | 45 | 4 |
Profesores de artes plásticas e deseño | 8 | 5 |
No caso da promoción interna, haberá 310 prazas, coa seguinte distribución:
Corpo | Prazas | Número de especialidades |
Inspectores de educación | 10 | 1 |
Acceso do Subgrupo A2 ao Subgrupo A1 Corpo de profesores de ensino secundario | 298 | 26 |
Corpo de Profesores de Artes Plásticas e Deseño | 2 | 2 |
O resto, ata completar as 2.628 prazas en 61 especialidades aprobadas, convocaranse unha vez o Ministerio de Educación publique a nova lei de Formación Profesional e un desenvolvemento da norma no relativo ao novo corpo que se crea (de profesores especialistas en sectores singulares da FP) e ás especialidades do extinto corpo de profesores técnicos de FP que se integran no corpo de profesores de ensino secundario.
Certezas para os opositores
Os exames destas oposicións seguirán o sistema habitual e non se verán afectados polos cambios plantexados polo Goberno Central no real decreto que está a preparar. En calquera caso, a Xunta convocará no último trimestre de ano un concurso de méritos que dea cumprimento ao cambio que consolide finalmente o Goberno Central, e co que se superarán as 3.000 prazas convocadas en Galicia neste ano.
Deste xeito, o Goberno galego blinda as oposicións de educación deste ano fronte ao cambio de criterio inesperado do Ministerio, ofrecendo certezas e seguridade aos opositores, cunha convocatoria que se axusta aos parámetros para os que xa están estudando.
Imaxes relacionadas
