Galicia pon ao dispor do Goberno central e das comunidades autónomas o estudo realizado en 2018 para mellorar as competencias profesionais docentes

Galicia vén de por a dispor do Goberno central e do resto das comunidades autónomas o estudo para a mellora das competencias profesionais docentes que concluíu en 2018 coas achegas do grupo de traballo constituído para tal fin en 2017 entre a Consellería de Cultura, Educación e Universidade, as facultades de Ciencias da Educación das tres universidades galegas e a rede de formación do profesorado.

Neste manual, -que no seu día tamén se deu a coñecer á Conferencia de Decanos de Educación de España-, apóstanse por elevar os estándares de prestixio e excelencia da carreira docente promovendo un cambio integral a través de tres efes: a formación inicial dos futuros profesionais que entran nas facultades de Ciencias da Educación, a formación para o acceso á docencia e a formación permanente do profesorado para asegurar a súa continua actualización.

O documento -que foi compartido co resto das administracións na reunión da Comisión General de Educación celebrada o xoves para abordar a carreira docente- establece un Marco de Competencias Profesionais Docentes en Galicia, no que se definen as competencias e habilidades básicas e necesarias que debe adquirir todo profesor.

Con este traballo de carácter técnico e rigoroso, e pioneiro a nivel do Estado, Galicia xa se ten adiantando de xeito proactivo aos cambios na carreira docente que agora quere levar a cabo a Administración central.

En todo caso, desde a Xunta reitérase que, dado a súa transcendencia, os cambios da función docente non se deben abordar dun xeito unilateral, senón a través dun Pacto de estado educativo que sexa o resultado de análise e de debate entre Goberno, comunidades autónomas e todos os axentes implicados.