Galicia avoga en Bruxelas polo establecemento dun marco de transición xusta para o sector do automóbil

O director xeral de Relacións Exteriores e coa UE, Jesús Gamallo, vén de representar a Galicia ao longo dun 148º pleno do Comité Europeo das Rexións no que se presentaron, para a súa aprobación, seis ditames e unha resolución e no que os seus membros puideron debater con varios comisarios europeos sobre asuntos de relevancia para a comunidade galega, como a "Estratexia de mobilidade intelixente e sostible" da UE coa comisaria de Transportes, Adina Valean.

En liña cos obxectivos do Pacto Verde Europeo, esta estratexia, publicada hai pouco máis dun ano, orienta a transformación ecolóxica e dixital do transporte co obxectivo de reducir nun 90% as súas emisións de aquí a 2050. En concreto, a Comisión Europea propón pasar a vehículos de cero emisións a partir de 2035, o que ha de impactar significativamente nas rexións automobilísticas como Galicia. Neste sentido, o CdR avoga, nun dos ditames aprobados durante este pleno, por un mecanismo de transición xusta para estas rexións, así como novas disposicións que permitan un mellor diálogo multinivel a prol dunha transición xusta.
Esta demanda ten a súa orixe no Grupo Interrexional da Automoción do CdR, do que forma parte Galicia dende a súa constitución hai máis de 10 anos. O CdR está a preparar agora unha alianza máis ampla de rexións cunha industria automobilística forte para demandar unha transición xusta para elas e para a súa man de obra. O sector da automoción europeo constitúe un poderoso motor de emprego industrial ao representar o 6% do emprego na UE e contar con 3.000 empresas provedoras dos grandes fabricantes, pemes na súa inmensa maioría. En Galicia, este sector supón un 13,5% do seu PIB e dá emprego directo ao redor de 25.000 persoas.
Por outro lado, os membros do CdR debateron sobre como coordinar os investimentos para revitalizar as zonas rurais a través dun Pacto Rural Europeo, lanzado en decembro, e sobre como asegurar un bo investimento do case medio billón de euros con que conta a política de cohesión 21-27.

Tras a entrada en vigor da nova lexislación o pasado mes de xullo, os Estados membros están agora a preparar os chamados acordos de asociación coa Comisión Europea, nos que se recollen as liñas principais de actuación dos fondos estruturais 21-27.

Asegurar a complementariedade e as sinerxías entre as diferentes fontes de financiamento comunitario (política de cohesión, NextGenerationUE...) supón un reto e unha prioridade para as administracións públicas, tal e como xa avanzara o director xeral de Relacións Exteriores e coa UE, Jesús Gamallo, durante a última reunión do ano do padroado da Fundación Galicia Europa.

O Comité Europeo das Rexións

O Comité Europeo das Rexións é a asemblea consultiva na que están representados os entes locais e rexionais da Unión Europea. En representación da Comunidade Autónoma de Galicia, o membro titular é o presidente da Xunta de Galicia, mentres que o cargo de membro suplente recae no director xeral de Relacións Exteriores e coa UE. A Fundación Galicia Europa presta apoio á participación galega nesta asemblea.