Ethel Vázquez salienta que as obras de ampliación do acceso ao polígono de Sabón, en Arteixo, están executadas ao 60% e rematarán en maio, logo dun investimento da Xunta de 6,3 M€

A conselleira de Infraestruturas e Mobilidade, Ethel Vázquez, salientou hoxe que as obras de ampliación da capacidade e humanización do acceso ao polígono de Sabón, en Arteixo, están executadas ao 60% e se rematarán en maio, logo dun investimento da Xunta de 6,3M€.

Vázquez Mourelle, xunto co alcalde de Arteixo, Carlos Calvelo, o delegado territorial da Xunta na Coruña, Gonzalo Trenor, supervisou hoxe os traballos iniciados en xaneiro do pasado ano e que se atopan en plena execución. Nestes momentos están traballando 22 operarios e 11 máquinas nas obras, que consisten na duplicación de carrís ao longo de toda a avenida da Deputación, desde a glorieta de Sabón ata a intersección coa avenida da Enerxía e coa avenida da Ponte.

A titular de Infraestruturas e Mobilidade puxo en valor esta actuación no principal acceso a unha das áreas industriais máis potentes da área da Coruña e tamén de Galicia, lembrando que é froito da colaboración co Concello de Arteixo. O obxectivo, apuntou, é dotar o polígono das mellores comunicacións posibles e ofrecer solucións ás retencións que se producen en horas punta, coa entrada e saída dos traballadores.

Coa intervención dotarase este acceso ao polígono de 4 carrís de circulación en todo o trazado entre a intersección da avenida da Deputación coa avenida da Ponte e a glorieta elevada de Sabón na que, tamén se levan a cabo actuacións de conservación, co pintado das partes metálicas. Ademais na actuación desdóbranse os carrís, para garantir unha maior fluidez no tráfico, reordénanse as interseccións: habilitando 2 turboglorietas, nos cruces coas avenidas do Embalse e da Moda, que facilitarán as entradas e saídas na vía principal sen interferir o tráfico que circula de forma continua.

Ademais, grazas ás actuacións previstas para a mellora das beirarrúas e o axardinamento, a conselleira destacou que esta actuación transformará unha vía visualmente “dura” pola influencia industrial, nunha rúa humanizada, integrando os viarios na trama urbana e que poidan ser empregados polos veciños nos seus desprazamentos habituais a pé, tamén cara ás praias.

Concretou que para acometer as obras os traballos dividíronse en 3 zonas, con accións específicas en cada unha delas. Así, o treito entre a glorieta de Sabón e a avenida do Embalse, contará cun carril adicional cara á Coruña, con conexión directa co ramal de acceso ao nivel inferior da rotonda; o que mellorará os tráficos, fundamentalmente dos vehículos pesados. Habilitaranse, tamén, beiravías e beirarrúas e disporase aparcadoiro en liña nunha zona.

No treito entre as avenidas do Embalse e da Moda, tamén se habilitará aparcadoiro en liña, beirarrúa e beiravías, ademais da execución de muros de contención para salvar as afeccións coas parcelas existentes. E na zona entre a avenida da Moda e a da Enerxía, dotarase de beirarrúas e beiravías ambas as marxes.

Nas obras acometeranse tamén traballos de drenaxe, unha rede soterrada de colectores para a recollida das augas da chuvia, con sistema de tratamento por decantación hidrodinámica; muros de contención, ademais de renovar as luminarias na avenida da Deputación.

A titular de Infraestruturas e Mobilidade explicou que as obras están moi avanzadas e resta, fundamentalmente, a execución de parte dos muros de contención e a reposición de servizos que precisan previamente de retranqueos.

Tamén falta a execución do pavimento e capa de rodaxe; o acabado de beirarrúas e ramplas de acceso; o axardinamento de zonas verdes e a integración paisaxística das glorietas, que seguirá o modelo que se vén empregando desde a Xunta, cunha imaxe identificativa que ofrece valor engadido á contorna.

Ethel Vázquez remarcou o esforzo de planificación realizado con estas obras, procurando minimizar en todo momento a afección ao parque industrial, mantendo reunións de seguimento cos empresarios, e traballando para reducir os prazos, posto que inicialmente estaba fixado o fin das obras en agosto de 2022.

Ethel Vázquez puxo en valor o traballo da Xunta para ofrecer infraestruturas e solo máis axeitado ás empresas para o desenvolvemento da súa actividade, mirando polo desenvolvemento empresarial de Arteixo e desta área. A este respecto, referiuse á posta en servizo da glorieta sobreelevada de Sabón, cun investimento de máis de 11 M€; o investimento de 1,3 M€ destinado á ampliación da avenida de Vilarrodís ou a execución do acceso ao polígono de Morás, cun investimento de 4,4 M€ para dotar dunha mellor conexión coa A-6 e a AG-55.

A conselleira tamén avanzou que en breve se iniciarán as obras para reforzar o sistema de abastecemento a Arteixo e ao polígono de Morás, que executa a Xunta e financia o Concello de Arteixo, cun investimento de máis de 3 M€. Neste momento estase cos traballos previos ao inicio da obra, que se prevé comezar a principios de febreiro.