A Xunta concede 72 bolsas para mobilidade do alumnado universitario en países extracomunitarios

A Xunta de Galicia vén de resolver a convocatoria das axudas á mobilidade do alumnado universitario a países extracomunitarios para o curso 2021/22, da que se benefician un total de 72 alumnos, todos os que cumpriron os requisitos da convocatoria. O Goberno galego recupera este ano esta liña de axudas despois de que a pandemia fixera imposible no 2020/21 o seu desenvolvemento.

Dos beneficiados, 15 son alumnos da Universidade de Santiago de Compostela, 22 da Coruña e 35 de Vigo. A listaxe completa pode consultarse no Diario Oficial de Galicia.

O obxectivo desta liña de axudas é favorecer a mobilidade internacional dos estudantes do Sistema Universitario de Galicia (SUG), de tal forma que o alumnado poida integrarse nunha comunidade internacional e multicultural que mellorará os seus coñecementos profesionais e lingüísticos, así como a súa cualificación.

Para acceder a estas axudas, os candidatos tiñan que estar matriculados neste curso en calquera das universidades do SUG, en estudos universitarios oficiais conducentes a unha titulación de grao e participar nun programa de mobilidade universitaria con autorización da universidade de orixe nun país de fóra da Unión Europea.

Cada un dos estudantes beneficiados accederá a unha axuda de 1700€ que lle facilitará a realización do programa de mobilidade, que deberá desenvolverse durante o curso académico 2021–2022.