A Xunta achega 90.000 euros a catro entidades sociais para apoialas na atención de persoas beneficiarias de proteccción internacional
O Goberno galego asinou senllos convenios con Provivienda, Diaconía, Diversidades e Movemento pola Paz, o Desarme e a Liberdade (MDPL) para colaborar na atención a refuxiados
A Xunta de Galicia achega máis de 90.000 euros a Provivienda, Diaconía, Diversidades e Movemento pola Paz, o Desarme e a Liberdade (MPDL) para colaborar na atención de persoas solicitantes e beneficiarias de Protección Internacional. Esta achega realizouse a través da sinatura de convenios con cada un destes colectivos que traballan na comunidade.
Esta axuda enmárcase no compromiso realizado pola conselleira de Política Social, Fabiola García o pasado mes de setembro, cando se reuniu coas entidades que forman parte do Programa Internacional de Protección e lles asegurou que Galicia “non escatimará en esforzos e fará todo o posible para apoialos en todo o que sexa necesario para que en Galicia encontren a estabilidade que non tiveron no seu país de orixe”.
Ademais destes convenios cos que as entidades desenvolven programas de inclusión en diferentes localizacións do territorio galego, a Administración autonómica axúdalle en todo o que sexa posible, dentro das súas competencias, como na provisión de recursos básicos, na escolarización das nenas e nenos ou no acceso á sanidade.
O Goberno galego mantén unha comunicación estreita e continua, que ten como principal finalidade coñecer de primeira man a situación de todos os refuxiados que chegan a Galicia e saber das necesidades das para poder apoialas en aquilo que fose necesario.