A Xunta investirá 1,8 M€ na execución de dúas sendas nas estradas OU-536 e ou-101, no Pereiro de Aguiar, que prevé licitar na primavera

A Xunta licitará na vindeira primavera as obras de dúas novas sendas peonís nas estradas OU-536 e OU-101, no concello do Pereiro de Aguiar, que suporán un investimento autonómico de arredor de 1,8 M€ e que cos que tamén se actuará nos concellos de Paderne de Allariz, San Cibrao das Viñas e Esgos.

Así o avanzou a conselleira de Infraestruturas e Mobilidade, Ethel Vázquez, no encontro que mantivo esta semana co alcalde, Luis Menor.

A titular de Infraestruturas explicou que nas vindeiras semanas está previsto contar con proxectos definitivos destas dúas actuacións, que se reformularon para minimizar en todo o posible as afeccións aos veciños, atendendo así as alegacións recibidas tras os procesos de información pública, así como as necesidades que transmitiron os concellos.
Concretamente, proxéctase a construción de novos treitos de senda na estrada OU-101: na Medorra, entre os puntos quilométricos 7+750 e 9+420; e no Paiseo, entre os quilómetros 13+780 e 14+230. O investimento estimado é de arredor de 865.000 euros.

Na estrada autonómica OU-536 executaranse novos treitos de itinerarios peonís nas Vendas, entre os quilómetros 11+890 e 12+810, e en Santa Baia, entre os puntos quilométricos 9+100 e 11+120. Estas actuacións contarán cun investimento autonómico próximo aos 930.000 euros.

Ethel Vázquez confirmou que, atendendo á solicitude do Concello, estes proxectos recollerán a preinstalación dos servizos de alumeado, como se fixo nas sendas que están actualmente en execución nas estradas OU-536 e OU-537.

Estas dúas actuacións serán cofinanciadas con fondos REACT e FEDER do período operativo 2014-2020.

A conselleira de Infraestruturas tamén se comprometeu a avaliar a viabilidade dun novo itinerario proposto polo Concello, para conectar a senda en execución da estrada OU-537, que chega ao parque empresarial e ao parque acuático, co encoro de Cachamuíña, cruzando a estrada OU-536.

Vázquez Mourelle informou, ademais, de que a comezos deste mes de decembro se retomaron os traballos das sendas na OU-537, na contorna dos parques empresariais, e na OU-536, na Derrasa, unha vez realizada a preinstalación do alumeado público e a restitución dun treito de luminarias. O grado de execución dos traballos rolda actualmente o 50%.

Estase a construír un novo itinerario pola marxe dereita da estrada autonómica OU-537, a vía dos parques empresariais, cunha lonxitude aproximada de máis de 2 quilómetros, entre a intersección coa OU-101, na Medorra, e a intersección coa OU-536, na Derrasa.

A outra senda vai pola marxe esquerda da OU-536, desde o punto quilométrico 7+080, á altura da ponte sobre o río Loña, no trazado da antiga estrada, frecuentada por peóns pola proximidade do encoro de Cachamuíña, ata o paso de peóns do punto 8+080, na Derrasa.

Estes dous treitos de senda mixta, peonil e ciclista, supoñen un investimento da Xunta superior a 1 M€. Están incluídos no Plan de sendas na comarca de Ourense, que suma un total de 15 quilómetros de itinerarios, seguros, sostibles e integrados na paisaxe, cofinanciados con fondos FEDER 2014-2020 para o fomento da mobilidade sustentable.