A Xunta abre a convocatoria para que os centros deseñen programas de integración das familias na actividade da biblioteca escolar

A Xunta de Galicia vén de abrir a convocatoria para que os centros educativos deseñen e poñan en marcha programas de integración das familias na actividade da biblioteca escolar ao longo do curso 2021/2022. Baixo o nome Lectura e Familias, esta nova iniciativa da Consellería de Cultura, Educación e Universidade está dotada con 125.000€.

Poderán participar neste proxecto ata 50 centros de todas as etapas educativas que estean integrados no Plan de Mellora Bibliotecas Escolares (PLAMBE). Para facelo deberán presentar a solicitude, incluíndo a descrición das actividades previstas, ata o 10 de decembro no espazo web de Bibliotecas Escolares.

O obxectivo deste novo programa é estimular o deseño e desenvolvemento de iniciativas que favorezan a participación das familias en actividades da biblioteca escolar, destinadas ao conxunto da comunidade educativa ou especificamente pensadas para a formación e a participación destas familias en experiencias de lectura e de traballo coa información e medios de comunicación. Deste xeito, poderán intervir con mellores recursos e eficacia na formación dos seus fillos como lectores e usuarios de información.

Esta acción enmárcase no impulso da participación das familias nas bibliotecas que a Xunta realiza a través do Plan LÍA (Lectura, Información e Aprendizaxe) na que se ten avanzado de xeito significativo nos últimos anos a través de programas como os Clubs de Lectura, Hora de ler ou as Mochilas viaxeiras.