O xerente do Consorcio Galego de Servizos de Igualdade e Benestar, Perfecto Rodríguez, e o alcalde do municipio, Ramiro Moure, comprobaron hoxe o resultado da actuación
A Xunta abre unha segunda aula na escola infantil de Taboada para dar servizo a máis familias
Con esta ampliación, o centro pasa de atender a 19 nenos nunha única unidade aos 24 actuais repartidos en dous grupos.
Investíronse 60.000 euros en redistribuír os espazos xa existentes no inmoble e en equipar a nova aula
A Xunta vén de poñer en funcionamento unha segunda aula na escola infantil de Taboada, coa que xa está a dar servizo a familias que quedaron sen praza ao inicio do curso o pasado mes de setembro. O xerente do Consorcio Galego de Servizos de Igualdade e Benestar, Perfecto Rodríguez, acompañado do alcalde taboadés, Ramiro Moure, visitou hoxe este centro para comprobar o resultado dos traballos de reforma levados a cabo para abrir esta nova unidade.
Con esta ampliación, a escola pasou de atender a 19 nenos nunha única unidade aos 24 actuais que ten distribuídos en dúas. Tras estas novas incorporacións, o centro ten ocupadas na actualidade todas as prazas dispoñibles. Así mesmo, a creación desta segunda aula tamén supuxo un incremento do cadro de persoal.
O Consorcio investiu máis de 60.000 euros, con cargo ao Fondo Europeo de Desenvolvemento Rexional (Feder), en acondicionar e en equipar esta nova aula, para o que se aproveitaron espazos xa existentes no inmoble. Esta dispoñibilidade permitiu acometer de maneira rápida as obras e sen necesidade de alterar o normal funcionamento da actividade na escola, posto que a actuación consistiu, basicamente, nunha redistribución interior de espazos.
Imaxes relacionadas
