A conselleira de Política Social, acompañada do delegado territorial da Xunta en Lugo, Javier Arias, visitou hoxe a residencia de maiores de Foz
Fabiola García sinala que as residencias “Foron, son e serán” un fogar para os seus usuarios gracias á implicación dos seus profesionais
Os profesionais deste centro impulsaron a creación de máscaras artesáns personalizadas durante a pandemia para animar ás persoas maiores
Apuntou que as residencias de maiores son hoxe os lugares máis seguros fronte á covid-19 porque todos os seus usuarios contan xa con tres doses
A conselleira de Política Social, Fabiola García, sinalou que as residencias “foron, son e serán” un fogar para os seus usuarios gracias á implicación dos seus profesionais. Esta mañá visitou a residencia de maiores de Foz acompañada do delegado territorial da Xunta en Lugo, Javier Arias, na que os traballadores realizaron unha exposición de máscaras personalizadas que empregaron durante a pandemia para animar ás persoas usuarias do centro.
A conselleira apuntou que iniciativas coma esta demostran que os traballadores das residencias amosaron o mellor de si mesmos para axudar a que as persoas maiores se sentiran protexidas e alegres durante os peores momentos da pandemia.
Neste sentido, volveu agradecer o seu labor porque, sinalou, gracias a eles estes peores momentos son agora mesmo tan só recordos. Fabiola García lembrou que as residencias de maiores son hoxe os lugares máis seguros fronte a covid-19 porque os seus usuarios contan xa con tres doses.
Imaxes relacionadas
