Fabiola García afirma que "o sistema de coidados do futuro comeza no Barbanza"

A conselleira de Política Social, Fabiola García, afirmou hoxe que “o sistema de coidados do futuro comeza no Barbanza”. Díxoo na firma dun convenio co alcalde de Ribeira, Manuel Ruiz, para a cesión da parcela municipal na que a Xunta construirá a primeira residencia pública de maiores na que se aplicarán as innovacións do novo modelo residencial.

Fabiola García explicou que a Xunta investirá 10 millóns de euros neste novo equipamento, que contará con 100 prazas distribuídas en módulos de convivencia 25 residentes, con habitacións individuais e baños adaptados. Ademais, sinalou que o inmoble estará dotado de máis tecnoloxía para mellorar o benestar dos usuarios, como se fixo na residencia pública da Estrada.

Tamén salientou que contará con zona axardinada exterior, así como o seu privilexiado emprazamento: ao carón da praia de Coroso e do seu paseo marítimo, e preto do hospital comarcal do Barbanza.

Quilómetro cero

A conselleira asegurou que con este novo centro, Ribeira e a zona do Barbanza “serán o quilómetro cero do novo modelo residencial de Galicia”. Unha transformación nos coidados residenciais baseado, segundo explicou, en tres piares fundamentais: unha maior colaboración dos ámbitos social e sanitario, a incorporación da tecnoloxía ás residencias de maiores, e a introdución de melloras estruturais e arquitectónicas para que os centros sexan verdadeiros fogares.