A Xunta difunde Conta Láctea como unha ferramenta útil para mellorar a posición negociadora dos gandeiros sobre os prezos do leite

O director xeral de Gandaría, Agricultura e Industrias Agroalimentarias, José Balseiros, acompañado do director da Fundación Juana de Vega, José Manuel Andrade, explicou hoxe aos socios da cooperativa CLUN o funcionamento de Conta Láctea, a nova aplicación informática para o cálculo de custos de produción nas granxas de vacún de leite.

No encontro, o director xeral trasladou as utilidades desta ferramenta, creada pola Xunta en colaboración con esta fundación, para calcular os investimentos e os custos de produción das explotacións leiteiras. Neste sentido, José Balseiros destacou que a principal finalidade da aplicación é mellorar a xestión económica das explotacións e tamén a capacidade negociadora dos gandeiros diante dos primeiros compradores de leite.
Co fin de acadar este obxectivo, a ferramenta -creada ao abeiro da Estratexia de dinamización do sector lácteo- permite, entre outras cousas, controlar os investimentos e os custos de produción e concretar canto custa producir un litro de leite e a que prezo se pode vender.
Ademais, Conta Láctea ofrece outras vantaxes, como son por exemplo o feito de ser de balde, ter un acceso sinxelo vía web, un manexo moi intuitivo e a posibilidade que aporta de emitir unha conta de resultados completa e un informe cos resultados obtidos. Este informe está pensado, precisamente, para empregarse por parte dos gandeiros como elemento de negociación do seu contrato coa industria, de tal xeito que o prezo percibido polo leite, de acordo coa lexislación, non poida ser inferior ao seu custo de produción.

Falla de compromiso do Goberno Central

Nesta liña, o director xeral insistiu en trasladar a preocupación da Xunta pola falla de compromiso do Goberno Central co sector primario en xeral e cos gandeiros en particular, unha actitude que se pon de manifesto coa súa escasa contundencia para frear a venda a perdas neste ámbito produtivo. Así, Balseiros lamentou a aprobación -o pasado mércores no Senado- do proxecto de lei da cadea alimentaria cos votos a favor do grupo maioritario no Goberno, tras rexeitar, entre outras, a emenda presentada para incorporar nesta norma a aplicación Conta Láctea como forma de acreditación do custo efectivo de produción.
Ademais, e co fin de garantir o cumprimento da prohibición da venda a perdas nas relacións nas que interveñan os operadores primarios, José Balseiros insistiu na necesidade de activar controis específicos por parte da Agencia de Información y Control Alimentarios (AICA).
No que lle compete á Xunta, o director xeral apuntou que a Consellería do Medio Rural si está a facer os seus deberes a prol do sector lácteo, coa implantación das medidas contidas na Estratexia do sector lácteo. Así, a través dela, iniciou a tramitación do Observatorio lácteo -co fin de acadar unha mellor estrutura sectorial- e da marca Leite de pastoreo de Galicia, un selo que se suma ao de Galega 100%, da que se está a facer unha promoción inxente.
José Balseiros destacou tamén a propia profesionalización do sector, materializada na celebración de ata cinco edicións dos cursos de Gandeiros 20-30, e a posta en marcha do Plan de pastos e da Lei de recuperación da terra agraria de Galicia, que permitirán dotar de base territorial ás explotacións galegas coa implantación de polígonos agrarios, no caso do lácteo para a produción de forraxes.
A presentación desta mañá na sede de CLUN en Ames forma parte do calendario establecido pola Consellería do Medio Rural para explicar o contido e alcance de Conta Láctea aos gandeiros galegos. Así, en vindeiras datas está previsto continuar esta rolda de contactos noutros puntos de Galicia, especialmente naquelas comarcas de maior vocación leiteira.
O acceso a Conta Láctea pódese facer a través da páxina web de Medio Rural, no seguinte enlace: https://www.contalactea.gal/pladel/.