Luis López destaca a proxección internacional da cultura viquinga e dos viños galegos para fortalecer o crecemento turístico de Galicia

O delegado territorial da Xunta en Pontevedra, Luis López, destacou hoxe a “enorme proxección internacional” da cultura viquinga e dos viños galegos, con forte presenza nas Rías Baixas e na comarca do Salnés e o Baixo Ullán, para seguir fortalecendo o crecemento turístico de Galicia.
O representante autonómico puxo en valor a Festa do Albariño de Cambados e a Romaría Viquinga de Catoira durante o acto de clausura da xornada temática Los Vikingos y el Vino en Galicia, organizada pola Asociación de Amigos do Capítulo Serenísimo do Albariño coa colaboración do Concello de Catoira e do colectivo Destination Viking e co apoio da Xunta de Galicia.
“O albariño e a cultura viquinga, ademais de protagonizar dúas festas de interese turístico internacional coñecidas e recoñecidas en Galicia e máis alá das nosas fronteiras, son dous produtos turísticos de primeiro nivel dos moitos e variados que temos en Galicia e que están a facer que, tras a fase máis dura da pandemia, sexamos o destino de moda en España e dos máis importantes de toda Europa, polo que todo acto de promoción é necesario e benvido”, indicou.
“Os viños galegos, e especialmente os das Rías Baixas, e a cultura viquinga son dous motivos máis que suficientes para visitar Galicia, pero é que ademais teñen unha enorme importancia social, económica e identitaria nesta comarca”, apostillou o delegado territorial.
Luis López agradeceu o posicionamento e a presenza de figuras internacionais neste evento “para seguir construíndo e promocionando Galicia” e destacou a labor de difusión da xornada temática para as rutas náutico-culturais Mar de Arousa e Río Ulla e a dos Viquingos -a segunda en importancia de toda Europa tras o Camiño de Santiago segundo certificou o Consello de Europa-, as rutas xacobeas tradicionais e os caldos galegos. “Os nosos viños viaxan por todo o mundo, como facían os antigos guerreiros viquingos, pero conquistan aos pobos con dozura grazas ao seu incomparable sabor e calidez”, concluíu.