A Xunta recibe catro ofertas para executar as obras de renovación do firme nos accesos dos hospitais públicos de Lugo, que suporán un investimento de 486.000 euros
Mellorarase a accesibilidade e a seguridade viaria nas contornas do Hospital Lucus Augusti, do Hospital de Calde, do Hospital Comarcal de Monforte e do Hospital da Costa e dotaranse de zonas de aparcadoiro os centros hospitalarios de Monforte de Lemos e de Burela
As obras nestes dous hospitais públicos iniciaranse o vindeiro mes de maio e quedarán rematadas a mediados do 2022, xa que teñen un prazo de execución de dous meses
A Xunta recibiu catro ofertas para executar as obras de renovación do firme nos accesos dos hospitais públicos de Lugo, que suporán un investimento de 486.000 euros.
Trátase de novas actuacións da Xunta para reforzar a seguridade viaria e favorecer os desprazamentos nas contornas dos centros hospitalarios da provincia, coa mellora do firme nas vías de acceso do Hospital Lucus Augusti, do Hospital de Calde, do Hospital Comarcal de Monforte e do Hospital da Costa. Ademais, baixo este contrato, dotaranse de zonas de aparcadoiro os centros hospitalarios de Monforte de Lemos e de Burela, habilitando en cada un deles entre 25 e 30 novas prazas.
A Consellería de Infraestruturas e Mobilidade prevé iniciar as actuacións o vindeiro mes de maio. Os traballos teñen un prazo de execución de 2 meses, polo que a mediados do 2022 estarán rematados.
As intervención obxecto deste contrato van dirixidas a corrixir os deterioros que presentan os pavimentos das vías de acceso destes hospitais, asegurando unha maior durabilidade da capa de rodaxe e favorecendo unha circulación de vehículos máis cómoda e segura.
Máis en detalle, no caso do Hospital Universitario Lucus Augusti renovarase o firme e o pavimento da zona de urxencias.
No Hospital de Calde completarase a mellora do firme coa renovación dos separadores vexetais que se atopan en mal estado, no viario de acceso ao hospital e na zona sur, colocando bordo de formigón no seu perímetro. Ademais, habilitarase un pequeno itinerario peonil na vía de acceso ao hospital, para facilitar os desprazamentos a pé e de xeito máis seguro.
En canto ás actuacións no Hospital Comarcal de Monforte, o departamento de Infraestruturas da Xunta ten proxectada a renovación do firme e o acondicionamento da zona de urxencias. Ademais, dotarase o centro hospitalario de máis prazas para aparcar, preparando unha explanada que permitirá obter entre 25 e 30 prazas de aparcadoiro.
En Burela, no Hospital da Costa, ademais de mellorar o firme dos accesos, renovaranse as beirarrúas nalgúns puntos e tamén se habilitará unha zona de estacionamento no antigo heliporto: entre 25 e 30 novas prazas de aparcadoiro. Isto fará preciso a execución dun muro de contención e obras de drenaxe, necesarias, ademais, pola remodelación das beirarrúas.
A Xunta segue apostando polos investimentos para seguir mellorando os equipamentos sanitarios da cidade de Lugo e tamén dos hospitais públicos da provincia.
Está a traballar no Centro Integral de Saúde de Lugo, como parte do proxecto de recuperación do barrio da Residencia, que permitirá poñer ao servizo dos veciños un equipamento sanitario de vangarda cun investimento autonómico de 12 M€.
Tamén, nesta aposta da Xunta pola sanidade pública da provincia, rematouse a 1ª fase da ampliación e reforma do Hospital da Costa en Burela na que se investiron 12,8 M€ e avánzase xa nos proxectos das seguintes fases, ademais da posta en servizo do novo centro de saúde do Saviñao.