11 empresas presentan ofertas para executar as obras que permitirán completar o saneamento no municipio de Irixoa cun investimento de 277.000€

Executaranse 5 ramais en tubaxe nas marxes das estradas, entre elas, na vía autonómica AC-151 e na provincial DP-0905

As obras enmárcanse no convenio de colaboración polo que a Xunta asume o 80% do investimento e o Concello contribúe co 20% restante
 

Santiago de Compostela, 9 de novembro de 2021

Un total de 11 empresas presentaron as súas ofertas para executar as obras que permitirán completar o servizo de saneamento no concello de Irixoa, cun investimento de 277.000 euros.

Esta intervención enmárcase no convenio de colaboración asinado en xuño entre a Consellería de infraestruturas e Mobilidade e o Concello para impulsar a mellora da rede de saneamento da parroquia de Irixoa, conformada por varios núcleos.

A parroquia dispón na actualidade de estación depuradora de augas residuais e un tramo do colector xeral que chega ata a parte central da zona urbana do núcleo, quedando pendente de executar o resto de colectores que conformarán e completarán a rede de saneamento.

A Xunta, a través de Augas de Galicia, asumirá o 80% do investimento. Tamén levará a cabo a contratación da execución, dirección e xestión das obras, que contan cun prazo de execución de seis meses.

Pola súa banda, o Concello de Irixoa contribuirá ao financiamento do 20% restante e asume a realización das xestións pertinentes para posibilitar a execución das obras, así como a recepción, mantemento e conservación das actuacións que se leven a cabo.

A actuación será financiada pola Unión Europea, no marco do Programa Operativo FEDER Galicia 2014-2020, como parte da resposta de la Unión á pandemia da covid-19.

A intervención prevé o desenvolvemento de 5 ramais en tubaxe, que se instalarán nas marxes das estradas existentes, entre elas, a vía autonómica AC-151 e a provincial DP-0905.

Segundo o proxecto redactado, esta obra permitirá que as augas residuais recollidas se vertan en dous puntos da rede de saneamento actual que as conducirá ata a depuradora, xa en servizo, e dimensionada para atender a unha poboación de 300 habitantes equivalentes.

Esta nova obra dará servizo a unha poboación de 177 habitantes para o ano horizonte 2041 que, sumada á xa conectada á depuradora, suporá 242 habitantes para ese ano horizonte.