A Xunta anima ás empresas de biomasa a implantar certificacións de sustentabilidade que melloren a súa competitividade

O director da Axencia Galega da Industria Forestal (Xera), Ignacio Lema, participou esta mañá na xornada en liña El camino hacia la sostenibilidad certificada: Sure, organizada polo Clúster da Biomasa de Galicia, dentro da estratexia de formación impulsada por Xera.

Na xornada, Lema animou ás empresas de biomasa a implantar este tipo de certificacións que, como Sure, demostran a sustentabilidade da produción de electricidade e calor a partir da biomasa, achegando unha mellora de competitividade ás compañías e unha oportunidade para abrir mercado. O director lembrou o esforzo que desde a Xunta de Galicia, a través de Xera, se está a realizar por mellorar a formación de toda a cadea da industria forestal e, en concreto, no eido da certificación.

Esta aposta manterase en 2022, xa que a Vicepresidencia segunda e Consellería de Economía, Empresa e Innovación destinará 15,2M€ a impulsar toda a cadea de valor da industria forestal galega promovendo a construción en madeira, mellorando a trazabilidade dos produtos, e fomentando a ecoinnovación e os procesos ecoeficientes.