O director xeral de Maiores e Persoas con Discapacidade, Fernando González Abeijón, participou hoxe na presentación do curso para novas promotoras
A Xunta inicia un programa de formación integral para a atención das persoas usuarias de casas do maior
A formación atende, entre outras cousas, ao tratamento do deterioro cognitivo, a aplicación de dietas adaptadas ou a realización de terapias
A última orde de axudas contempla a creación de 71 novos centros en toda a Comunidade
O director xeral de Maiores e Persoas con Discapacidade, Fernando González Abeijón, participou esta tarde na inauguración do programa de formación integral e complementaria para os profesionais das novas casas do maior que se está a celebrar nas instalacións do Cegadi, en Santiago de Compostela. A última orde de axudas contempla a creación de 71 novos centros por toda a Comunidade.
O curso está conformado por tres módulos: un sanitario, outro relacionado co ámbito dos servizos e un último de terapias adaptadas. Así, entre os contidos que se impartirán atópanse o tratamento do deterioro cognitivo, a demencia ou problemas clínicos habituais. Ademais, tamén se incorporan programas formativos para a limpeza das instalacións, o lavado de roupas e a aplicación de dietas.
O programa desenvolverase durante os primeiros tres venres deste mes e contará con poñentes especializados no ámbito dos coidados, como enfermeiros, médicos xeriatras, outros promotores de casas do maior ou animadores sociais e terapeutas. O director xeral sinalou que este curso permitirá resolver as dúbidas que poidan ter as adxudicatarias dos futuros centros.
Imaxes relacionadas
