O director xeral de Familia, Infancia e Dinamización Demográfica, Jacobo Rey, mantivo hoxe unha reunión coa Asociación de casas niño
A Xunta incrementará o orzamento para as casas niño nun 10% en 2022
O Goberno galego destinará máis de 2,3 millóns a estes recursos de conciliación no rural, fronte aos máis de 2,1 millóns destinados en 2021
A orde de subvencións pasará, ademais, a ter carácter plurianual, de maneira que abranguerá un período de tres anos e axilizarase a tramitación para cobrar antes os anticipos da subvención
As adxudicatarias poderán compartir unha persoa substituta entre casas niño da mesma zona ou comarca
O director xeral de Familia, Infancia e Dinamización Demográfica, Jacobo Rey, mantivo unha reunión hoxe coa Asociación de casas niño na que lles trasladou o incremento que vai experimentar o investimento para as casas niño en 2022, que aumentará un 10% respecto ao do presente exercicio.
O director xeral sinalou, así, que a Consellería de Política Social destinará o vindeiro ano máis de 2,3 millóns de euros a estes recursos de conciliación no rural fronte aos máis de 2,1 millóns investidos en 2021. Son xa 90 os centros de atención a nenos de entre 0 e 3 anos que hai repartidos por toda a comunidade.
Orde plurianual
Outra das cuestións abordadas durante a reunión foi o cambio da orde de axudas para que teña un carácter plurianual. Deste xeito, abranguerá un período de tres anos, o que axilizará a tramitación e permitirá cobrar antes o anticipo da subvención. Con respecto, á orde do ano 2022, realizarase unha axilización dos trámites para que poidan cobrar o anticipo do 90% durante o mes de febreiro.
Por último, tamén se trataron outras cuestións como a posibilidade de compartir unha persoa substituta entre casas niño da mesma zona ou comarca, así como a ampliación dos días festivos.