O director xeral de Familia, Infancia e Dinamización Demográfica, Jacobo Rey, deu hoxe a benvida aos participantes nun encontro organizado pola entidade na Residencia de Tempo Libre do Carballiño
A Xunta destaca o traballo de ASFEGA no apoio ás persoas con enfermidades metabólicas
Médicos e especialistas en nutrición comparten coñecementos e experiencias con persoas afectadas por estas doenzas
O director xeral de Familia, Infancia e Dinamización Demográfica, Jacobo Rey, deu hoxe a benvida ás persoas que durante esta fin de semana participan nun encontro sobre enfermidades metabólicas, que ten lugar na Residencia de Tempo Libre da Xunta no Carballiño. A Asociación Fenilcetonúrica y OTM de Galicia (Asfega) é a organizadora destas xornadas, que contan coa presenza de profesionais médicos, investigadores e especialistas en nutrición.
Jacobo Rey destacou o traballo de apoio, información e asesoramento ás persoas con enfermidades metabólicas e ás súas familia que desde hai anos realiza Asfega. Así mesmo, valorou a importancia que teñen estes encontros para compartir experiencias e adquirir maiores coñecementos sobre os trastornos alimentarios.
Entre os temas que se abordan nestas xornadas, está o programa galego de cribado neonatal, as dietas e a nutrición máis axeitada para os afectados por esta doenza, ou as estratexias e recursos para a mellora dos tratamentos en adolescentes e adultos.
Imaxes relacionadas
