A Xunta fixa nos orzamentos 2022 uns investimentos iniciais de 38,5 M€ para a comarca do Salnés e de 15,6 M€ para a de Caldas

A Xunta de Galicia vén de fixar uns investimentos iniciais de 38.581.524 euros para a comarca do Salnés e de 15.649.095 euros para a de Caldas no proxecto de Orzamentos 2022, segundo revelou hoxe o delegado territorial, Luis López, na presentación das contas para estas dúas bisbarras nunha visita ao Hospital do Salnés.

“A Xunta de Galicia é a administración que máis inviste, de longo, nestas dúas comarcas, xa que o punto de partida en investimentos para ambas sitúase en 54,2 millóns de euros, unha contía recollida de xeito específico e nominativo, que xurde do noso compromiso con este territorio do norte da provincia e que vaise ampliar con total seguridade a través dos plans, convenios, ordes de axudas ou novos proxectos que xurden ao longo do ano”, manifestou o representante autonómico, que detallou que a cifra é cinco veces superior aos investimentos para a zona contemplados polo Goberno de España nos Orzamentos do Estado e máis do dobre ca da Deputación de Pontevedra.

“Son uns investimentos moi completos e vanse incrementar seguro e ademais tocan todos os ámbitos de interese cidadá no Salnés e Caldas, xa que as actuacións deseñadas apostan polas infraestruturas, a mobilidade, a sanidade, a educación, o saneamento e o medio ambiente, o emprego, as emerxencias e o mar”, apostillou.

Luis López acudíu, xunto ao xerente da área sanitaria, José Ramón Gómez, e a xefa territorial de Sanidade, Natalia Botana, ao hospital arousán, para presentar estes investimentos, que precisamente recollen unha partida de 769.618 euros para a súa área de esterilización.

O delegado territorial salientou que, no caso do Salnés, destacan especialmente, pola súa contía ou singularidade, os 12 millóns de euros para a planta de biorresiduos de Vilanova, que está en licitación e se acometerá o vindeiro ano, os 100.000 euros para a redacción do proxecto do novo centro de saúde de Vilagarcía na vella Comandancia, os 1.339.591 euros para o nodo de comunicación intermodal da capital, “que será o mellor de Galicia tras os das sete cidades”, ou os 635.571 euros para a ampliación da Escola de Educación Infantil Vagalume, “como primeiro exemplo e mostra de compromiso das moitas actuacións que imos ir acometendo no 2022 en materia educativa e que, só este ano, superaron a quincena no Salnés”.

A distribución territorial por municipios repártese do seguinte xeito: Vilanova de Arousa (17,8 millóns), pola construción singular da planta ambiental, Vilagarcía (10,4 millóns), Cambados (3,1 millóns), O Grove (2,3 millóns), Sanxenxo (2,2 millóns), Ribadumia (1 millón), A Illa de Arousa (723.000), Meis (685.000) e Meaño (197.000).

“Os principais investimentos roldan os 27 millóns de euros, pero as contas da Xunta tamén contemplan para O Salnés outros investimentos en instalacións deportivas, novas tecnoloxías, maquinaria sanitaria, melloras nas zonas de produción mariña, acuícola e marisqueira, eficiencia enerxética, melloras en centros sociais, silvicultura, limpeza de montes e desbroces, obras xudiciais e educativas, transporte ou dixitalización no ensino ata alcanzar os citados 38,5 millóns”, significou o delegado.

Actuacións en Caldas

Por outra banda, Luis López tamén concretou os investimentos para a comarca de Caldas, entre os que destacan as melloras no centro da terceira idade e no edificio ocupacional do Saiar, a sinalización e acondicionamento do Camiño de Santiago, o solo empresarial de Pontecesures ou o centro de saúde de Moraña coa seguinte distribución territorial: Pontecesures (5,4 millóns), Caldas de Reis (3,4 millóns), Valga (2,8 millóns), Moraña (1,8 millóns), mentres que Catoira, Cuntis e Portas sitúanse algo por baixo do millón de euros.