O CGAC acolle a mostra de Clara Carvajal 'Por unha bioloxía da imaxe', que afonda na dimensión plástica e escultórica da fotografía
O secretario xeral de Cultura, Anxo M. Lorenzo, presentou hoxe a exposición, acompañado pola artista madrileña, a comisaria, Zara Fernández de Moya, e o director do Centro Galego de Arte Contemporánea, Santiago Olmo
Estará aberta ao público ata xaneiro de 2022, con visitas guiadas todos os domingos ás 12,00 horas
O Centro Galego de Arte Contemporánea (CGAC) acolle a mostra Clara Carvajal. Por unha bioloxía da imaxe, na que se poden contemplar dúas series sucesivas desta artista madrileña, Dioses de la frontera e Argucia, coas que indaga na dimensión plástica e escultórica da fotografía. O secretario xeral de Cultura, Anxo M. Lorenzo, presentou hoxe a exposición, acompañado por Carvajal, a comisaria, Zara Fernández de Moya, e o director do CGAC, Santiago Olmo.
Segundo explicou o representante da Consellería de Cultura, Educación e Universidade, a mostra recolle “a primeira achega da artista á bioloxía da imaxe, un concepto novo co que Carvajal se interroga sobre a capacidade de transformación da imaxe, que se actualiza en cada medio e se engrandece”. “En palabras da propia Clara Carvajal, é un xeito de aludir a aquilo ao que estamos tan afeitos, que xa non o vemos”, sinalou.
Por unha banda, Dioses de la frontera abre o camiño a unha viaxe expositiva e vital en Beirut, onde a artista lle dá un novo significado ás imaxes da Arab Image Foundation, os arquivos do xornal An-Nahar e do fotógrafo Émile Boulos Divers. O obxectivo é desentrañar as formas culturais que se mostran nas poses das personaxes das fotografías, na busca dunha cosmovisión do pobo libanés. Nesta serie, a imaxe materialízase en fotografía impresa, texto escrito, talla en madeira e na súa estampaxe.
Por outra parte, Argucia representa un paso máis ao incorporar a tridimensionalidade en sete caixas que funcionan como contornas abertas. Trátase de pequenas esculturas que lle renden tributo ao Museo portátil do artista francés Marcel Duchamp, e nas que Carvajal se interroga sobre o que se desvela ao contemplar certas imaxes.
Con ambas series, Clara Carvajal mergullouse nunha exploración orixinal na que a arte se converte no medio natural para se somerxer na procura das formas sociais e políticas. Por unha bioloxía da imaxe poderá visitarse ata o 23 de xaneiro de 2022 no Dobre espazo do CGAC.
Charla, visitas guiadas e catálogo arredor da mostra
Como complemento á exposición, Anxo M. Lorenzo avanzou que esta tarde haberá unha charla de presentación ao público, coa participación da artista, a comisaria e o director do CGAC. Será ás 19,00 horas no Auditorio do Centro Galego de Arte Contemporánea.
Así mesmo, todos os domingos ás 12,00 horas haberá visitas guiadas á mostra xunto con mediadoras especializadas en arte. Os percorridos teñen unha duración aproximada de 50 minutos e non precisan inscrición previa.
Por outra banda, o CGAC vai editar o catálogo Por unha bioloxía da imaxe, con textos de Zara Fernández de Moya, Nuria Medina, Teo Millán e Santiago Olmo. Inclúe tamén unha entrevista coa artista, na que reflexiona sobre o concepto de bioloxía da imaxe e sobre a xénese das series expostas.
Nacida en Madrid en 1970, Clara Carvajal é unha artista feminista que traballa con procesos culturais de linguaxes do Mediterráneo e Oriente Medio. O seu obxectivo son a tecnoloxía dixital e as escrituras gráficas xeométricas. Desde o pasado ano é a presidenta da Asociación de Artistas Visuais de Madrid.