A Xunta leva os seus programas de formación para o emprego e liderado feminino á feira Edugal
A Consellería de Emprego e Igualdade divulga nun stand propio na feira de Pontevedra o seu pioneiro campus virtual de formación para o emprego e os programas para favorecer a empregabilidade de traballadores menores de 30 anos
Para promover a formación na área das tecnoloxías, a instalación conta coa presenza de robots que interactúan coas persoas visitantes
Un obradoiro asesorará aos máis novos sobre como enfrontar unha entrevista de traballo ou deseñar un currículo
A Consellería de Emprego e Igualdade conta cun espazo propio na feira Edugal, que se celebra ata o próximo 22 de outubro no recinto feiral de Pontevedra, no que se desenvolven obradoiros, mesas redondas e relatorios especialmente dirixidos a orientar á mocidade e á comunidade educativa sobre o seu futuro profesional. No marco da mesma dáse a coñecer aos asistentes o pioneiro campus virtual de formación para o emprego que a Xunta ven de lanzar.
O Goberno galego aproveita a feira Edugal para informar sobre os seus programas e medios de formación para o emprego, cun modelo actual e dinámico adaptado ao público novo e apostando pola cualificación nun ambiente tecnolóxico. Neste marco, a Consellería de Emprego e Igualdade conta con robots que acompañan as presentacións de temáticas como as habilidades brandas ou obradoiros para mellorar o currículo e enfrontar as entrevistas de traballo.
No contexto da feira, a Consellería de Emprego e Igualdade está a dar a coñecer ao público o Campus Virtual da Xunta de Galicia, primeiro en España na teleformación para o emprego. Tamén programas como formadores dixitais e iniciativas relacionadas coa igualdade laboral e liderado feminino coas que o Goberno galego mantén un firme compromiso.
De carácter máis práctico, impartirase durante a última xornada, mañá venres, un obradoiro sobre a confección de currículos, de cartas de presentación e de como preparar as entrevistas de traballo. Rosanna López Salgueiro, directora da Fundación Pública Galega da Formación para o Traballo, será a encargada de impartir este taller, acompañada do robot Tokio, no stand que recibirá tamén mañá á conselleira de Emprego e Igualdade, María Jesús Lorenzana, durante a súa visita á feira.
Polo espazo de Emprego na feira xa pasaron ata o momento a directora xeral de Formación e Colocación, Zeltia Lado Lago, que tomou parte nunha mesa sobre a empregabilidade das persoas mozas, e a directora xeral de Emprego, Traballo Autónomo e Economía Social, Covadonga Toca que, pola súa banda, moderou unha sesión sobre o papel das mulleres no mundo da empresa e o emprendemento.