Miranda recibe a Carlos González, un recoñecido gaiteiro formado nos obradoiros dos centros galegos do Uruguai

O secretario xeral da Emigración, Antonio Rodríguez Miranda, recibiu esta mañá no seu despacho a Carlos González, un recoñecido gaiteiro galego do Uruguai formado en distintos obradoiros postos en marcha nos centros galegos do Uruguai e, tamén, a través das Escolas Abertas da propia Secretaría Xeral da Emigración. Agora imparte docencia como mestre en varias entidades galegas deste país do Cono Sur.

Carlos González visitou Galicia estes días para participar en varios programas da televisión autonómica tras quedar semifinalista nun dos talent show máis coñecidos do país sudamericano. Aproveitou a visita para realizar unha demostración da súa maestría coa gaita aos traballadores da Secretaría Xeral da Emigración.