A Xunta publica no Diario Oficial de Galicia a aprobación do proxecto de mellora da seguridade viaria na PO-542, en Pazos, no Concello de Pontevedra
A intervención, que supón un investimento autonómico de preto de 830.000€, mellorará a actual intersección en cruz e permitirá diminuír a velocidade nese tramo da vía ao seu paso pola parroquia de Marcón
A actuación proxectada tamén inclúe a reordenación do espazo público da estrada entre os tramos 4+480 e 5+040
A Consellería de Infraestruturas e Mobilidade publica hoxe no Diario Oficial de Galicia (DOG) a aprobación do proxecto de execución de mellora da seguridade viaria na estrada autonómica PO-542, en Pazos, no concello de Pontevedra.
A actuación nesta vía autonómica ao seu paso pola parroquia de Marcón conta cun investimento de preto de 830.000 euros e recolle actuacións de mellora no tramo comprendido entre os puntos quilométricos 4+700 e 5+600.
O DOG recolle hoxe a aprobación do expediente de información pública e definitivamente o proxecto de construción deste proxecto. No seguinte enlace pódese ampliar a información relativa a esta resolución.
O obxecto da actuación proxectada polo departamento que dirixe Ethel Vázquez é mellorar a actual intersección en cruz do punto quilométrico 4+900, reducir o número de xiros á esquerda no tramo entre os puntos quilométricos 4+700 e 5+600 e favorecer unha diminución así da velocidade no tramo.
A disposición da nova glorieta permitirá a reordenación da actual intersección en cruz. Este tipo de nó está caracterizado porque os tramos que en el conflúen comunícanse a través dun anel no que se establece unha circulación rotatoria arredor dun illote central. Deste xeito, as traxectorias dos vehículos non se cruzan senón que converxen e diverxen, reducindo o número de conflitos.
O proxecto inclúe, ademais, a reordenación do espazo público da vía autonómica entre os tramos 4+480 e 5+040.