A Xunta destaca en Redondela a importancia de incentivar as vendas no comercio de proximidade

O director xeral de Comercio e Consumo, Manuel Heredia, destacou hoxe a importancia de incentivar as vendas no comercio de proximidade con iniciativas como os Shopping Days, que organiza a Asociación de Empresarios de Redondela entre hoxe e mañá.

Nela participan máis de 40 establecementos do municipio que abrirán en horario de 10:00 a 22:00 horas con descontos especiais. A rúa Ribeira acollerá un área na que se instalarán os comercios de zonas como Chapela, os que se atopan máis afastados do centro da vila ou os que non teñen espazo suficiente na entrada para exhibir os seus produtos.

O director xeral de Comercio e Consumo salientou que Xunta e sector están a traballar conxuntamente para promocionar o comercio de proximidade nas vilas e cidades e favorecer a reactivación do consumo tras a pandemia. E, nese sentido, aplaudiu os beneficios deste tipo de iniciativas, que se suman a programas postos en marcha polo Goberno galego como o Bono Activa Comercio, que ofrece descontos de 30 euros aos consumidores nos máis de 5.600 establecementos adheridos en Galicia.

Segundo dixo, outra das prioridades é que o comercio de proximidade en Galicia se vaia adaptando ás novas demandas e formas de consumir que teñen que ver coa dixitalización e o comercio electrónico, porque a pandemia puxo a proba a importancia de estar presentes na rede para poder vender en tempo real as 24 horas do día e os 365 días do ano.

Hoxe máis que nunca o comercio físico necesita desenvolver a súa faceta virtual para exercer, literal e plenamente, como comercio de proximidade, abondou, para recalcar que a Xunta vai seguir acompañando o sector para impulsar a súa competitividade.