Feijóo expón a combinación de valores e feitos como a base do autogoberno galego a través do cal Galicia acadou un grao de desenvolvemento e benestar descoñecidos na súa historia

O presidente do Goberno galego, Alberto Núñez Feijóo, referiuse hoxe á combinación de valores e feitos como a base do autogoberno galego a través do cal Galicia acadou un grao de desenvolvemento e benestar descoñecidos na súa historia.

“Os galegos aprendemos que a democracia é fermosa e moi útil. Con ela satisfacemos os nosos desexos de liberdade e, ao mesmo tempo, resolvemos problemas cotiáns e estimulamos o talento individual e colectivo”, afirmou, incidindo en que a defensa da democracia require atender ambas as frontes.

Nesta liña, e durante a inauguración da III edición do Foro La Toja-Vínculo Atlántico, presidida pola S.M. o Rei Felipe VI, Feijóo apelou a coidar os valores democráticos e defendelos sen tregua tanto na acción política cotiá como nos foros de pensamento, fronte “aos cantos de sereas” dos populismos e os seus intentos de facer naufragar a nave democrática.

“A democracia non se defende por si mesma. Ha de ser protexida sen desmaio porque a súa esencia está na forza das ideas, non na idea da forza”, abundou, recordando que é o único sistema capaz de reflexionar criticamente sobre si mesmo.

Sobre este punto, resaltou a utilidade de encontros coma este foro para abordar os retos e as ameazas da democracia liberal, “sabendo que o seu futuro só depende de nós”, concluíu.