O secretario xeral para o Deporte participa da inauguración da Semana Azul 2021
Organizada pola Asociación Ría de Vigo de Entidades Náuticas – ARIVEN, a Semana Azul diríxese dar a coñecer a gran oferta de actividades náuticas da ría de Vigo.
O secretario xeral para o Deporte, José Ramón Lete, participou na mañá de hoxe da inauguración da Semana Azul 2021, celebrada no Real Club Náutico de Vigo, acto no que tamén estiveron presentes o comandante director da Escola Naval de Marín, Pedro Cardona, o presidente da Autoridade Portuaria de Vigo, Jesús Vázquez, e a delegada territorial da Xunta de Galicia en Vigo, Marta Fernández-Tapias.
Durante a súa intervención o secretario xeral destacou “a importancia das actividades náuticas como parte esencial para o desenvolvemento social e económico Galicia, o que ten a súa replica no ámbito deportivo”, sinalou Lete Lasa. O responsable do departamento de deportes da Xunta de Galicia recordou os éxitos da alta competición galega (os 5 ouros olímpicos galegos corresponden a deportes náuticos, xunto a 8 pratas e 3 bronces) así como o crecente desenvolvemento da base deportiva nestas modalidades, grazas á labor realizada polas entidades deportivas e as actividades propias postas en marcha, como é “Xogando co vento e coa auga” dirixida aos escolares galegos.
Lete Lasa apostou por esta liña ascendente da náutica deportiva galega, recordando a importancia para este crecemento da labor realizada dende os centros autonómicos do Complexo Náutico e Campo de Regatas de Verducido-David Cal, e o Centro Galego de Vela de Vilagarcía.
A Semana Azul é un evento organizado pola Asociación Ría de Vigo de Entidades Náuticas, ARIVEN, a través do que coñecer e integrar as actividades de carácter náutico deportivo presentes na contorna da Ría de Vigo. A Semana Azul pon así en valor a cultura e tradición ligada á náutica, como fonte de lecer, saúde, benestar e desenvolvemento económico.