A Xunta mostra en Ourense unha selección de gravados composteláns dos séculos XVII e XVIII
O secretario xeral de Cultura, Anxo M. Lorenzo, inaugurou hoxe a exposición ‘Símbolos xacobeos e imaxes de Santiago. Impresos do barroco compostelán’
Organizada polo Museo Arqueolóxico Provincial de Ourense, poderá visitarse ata xaneiro de 2022 na Sala de Afundación, na Praza Maior
O secretario xeral de Cultura, Anxo M. Lorenzo, inaugurou hoxe en Ourense a exposición Símbolos xacobeos e imaxes de Santiago. Impresos do barroco compostelán, organizada polo Museo Arqueolóxico Provincial. Na mostra, que poderá visitarse ata o 16 de xaneiro de 2022 na Sala de Afundación situada na Praza Maior, a Xunta expón unha selección de 61 gravados composteláns dos séculos XVII e XVIII.
Segundo salientou o representante da Consellería de Cultura, Educación e Universidade na súa intervención, trátase de pezas abertas por afamados gravadores locais e foráneos, utilizadas polas tipografías composteláns, co denominador común de que aparezan os símbolos xacobeos ou a imaxe de Santiago. Con elas atendíase “unha tripla demanda, a da Universidade, coas follas de grao, do Cabido, para documentos relacionados co culto xacobeo, e estampas de finalidade relixiosa destinadas á devoción popular”, explicou.
Comisariada por Yolanda Barriocanal, profesora da Universidade de Vigo, a mostra reúne e ordena unha selección destas ilustracións en diferentes soportes. Anxo M. Lorenzo sinalou tamén que a instalación recrea un escenario mudable e ilusorio, conforme á sensibilidade e teatralidade propia do Barroco.
Xunto ao secretario xeral, participaron no acto de inauguración a comisaria, o director do Museo Arqueolóxico Provincial de Ourense, Xulio Rodríguez, e o vicepresidente de Afundación, Xosé Carlos Caneiro.