A Xunta destaca o valor das asociacións na promoción dos produtos do mar e no desenvolvemento socioeconómico do litoral

A directora xeral de Desenvolvemento Pesqueiro, Susana Rodríguez, participou na inauguración do III encontro de produtores do mar e da terra Maridar III. Sabor das Mariñas. Dieta atlántica, cultura e paisaxe, que organiza a Federación de Asociacións Empresariais das Mariñas. Alí a representante do Executivo galego enxalzou o importante papel das asociacións na promoción de produtos do mar e no desenvolvemento socioeconómico das zonas costeiras.

Un exemplo dese valor, expuxo, represéntao a Federación de Asociacións Empresariais das Mariñas que organiza este evento que reúne a produtores do mar e da terra e que acolle Oleiros entre hoxe e este domingo. Esta iniciativa, que vai pola terceira edición, combina accións relacionadas coa gastronomía, o lecer e o turismo a través de obradoiros de cociña, conferencias e mesas redondas e actividades náuticas e de surf. Algunhas destas actividades están destinadas ao público infantil e promoven o consumo de produtos do mar e da terra da zona do Golfo Ártabro Sur.

Este tipo de iniciativas, subliñou Susana Rodríguez, concordan con outras que promove a Xunta como a campaña GALICIA SABE AMAR, que incide na importancia de comer peixes e mariscos e na gran variedade de produtos da máxima calidade que o complexo mar-industria de Galicia pon a disposición dos consumidores.

Susana Rodríguez tamén aproveitou a ocasión para destacar o papel dos grupos de acción local do sector pesqueiro na promoción dos recursos do mar e no desenvolvemento das economías costeiras e agradeceu a todos os organizadores do encontro o seu traballo para que citas coma esta sigan sendo unha realidade.