A Xunta e as asociacións de orquestras de verbena planifican o reforzo do apoio ao sector cunha nova serie de concertos dentro do Xacobeo 21-22

O director da Axencia Galega das Industrias Culturais (Agadic), Jacobo Sutil, e os representantes da Asociación Galega de Orquestras (AGO) e da Asociación de Empresas de Verbena de Galicia (Asevega) mantiveron onte pola tarde na Cidade da Cultura de Galicia a terceira das reunións semanais que están a desenvolver para planificar o reforzo do apoio que o sector vén recibindo por parte da Xunta para lles facer fronte aos efectos da crise sanitaria.

En concreto, estase a deseñar a ampliación da contía económica e das actividades previstas do convenio asinado o pasado mes de xullo no marco do Xacobeo 21-22 e a través do que inicialmente se destinaron 400.000 euros a cofinanciar máis de 100 concertos e probas piloto. Engadiráselles agora unha serie de novas actuacións nas cidades galegas, buscando un formato homoxéneo para todas elas e que garanta a seguridade tanto do público como dos artistas e técnicos participantes.

Reunións periódicas

As medidas consensuadas nestas reunións periódicas suporán un novo avance no apoio que o sector das orquestras vén recibindo por parte do Goberno galego, en atención á súa importancia tanto social como económica. De feito, a Xunta foi a primeira administración autonómica en adxudicar axudas específicas a este ámbito, no marco dun compromiso continuado, que se vén plasmando en numerosas xuntanzas para a articulación das diferentes liñas de colaboración.
Ademais do devandito convenio, asinado como parte do Plan de reactivación cultural, destaca tamén entre as vías de apoio ao sector o programa de subvencións a orquestras publicado en outubro de 2020, a través do que se adxudicaron a través de Turismo de Galicia 1.079.000 € a 51 empresas. Así mesmo, o pasado mes de abril a Xunta abriu a convocatoria de axudas para traballadores estacionais de orquestras e espectáculos prexudicados polos peches da covid-19, dotadas con 500.000 €, mentres que en xuño se aprobou o III Plan de Rescate para autónomos e pemes afectados pola crise da covid-19. As orquestras tamén poden beneficiarse deste novo plan ao igual que do previo, aprobado en febreiro.