A Xunta comeza as obras de instalación de novo peitoril na Ponte Vella da estrada AC-550 en Noia
A intervención, cun investimento de máis de 48.000 euros, ten como obxectivo protexer os peóns que circulan pola beirarrúa
Os traballos céntranse na substitución e instalación dunha nova barreira para contención dos vehículos nesa ponte, previa retirada da actual, soportada por perfís metálicos
Mellorarase tamén a estética desta zona, moi transitada e sensible desde o punto de vista patrimonial e natural
O departamento que dirixe Ethel Vázquez continúa traballando no mantemento das estradas autonómicas co obxectivo de reforzar a seguridade viaria
A Consellería de Infraestruturas e Mobilidade comezou as obras para a instalación de novo peitoril na ponte vella da estrada autonómica AC-550, ao seu paso polo concello de Noia.
Estas obras, cun investimento autonómico de máis de 48.000 euros, terán un prazo de execución estimado de 1 mes.
A actuación consiste na substitución do elemento de contención de vehículos nesta ponte situada no punto quilométrico 73+200 da vía autonómica, que na actualidade conta cunha barreira soportada por uns perfís metálicos.
Deste xeito, as obras comprenden a desmontaxe e retirada do actual sistema de contención e a instalación dunha nova barreira para contención dos vehículos, de xeito que quede protexido o tráfico de peóns que circula pola beirarrúa.
Os traballos impulsados polo departamento que dirixe Ethel Vázquez suporán, ademais, unha mellora estética nunha zona moi transitada e sensible desde o punto de vista patrimonial e natural.
A Xunta continúa traballando no mantemento das estradas autonómicas co obxectivo de reforzar a seguridade viaria.
Imaxes relacionadas
