A Xunta apoia a arte urbana para o desenvolvemento de produtos turísticos locais

A directora de Turismo de Galicia, Nava Castro, acompañada da presidenta do Centro de Iniciativas Turísticas de Ferrol, e o responsable do proxecto de arte urbana Meninas de Canido, Eduardo Hermida, participou hoxe na homenaxe á menina Agustina Sarmiento, figura que aparece no célebre cadro de Velázquez e quen nacera na vila galega de Ponteareas. A nova edición das Meninas de Canido desenvólvese esta fin de semana con distintas actividades que homenaxean o cadro universal do pintor sevillano.
Nava Castro felicitou aos organizadores desta homenaxe pola súa orixinalidade e manifestou que proxecto coma este permiten crear produtos senlleiros relacionados co turismo urbano e co desenvolvemento local. Así, indicou que o proxecto Meninas de Canido, coñecido no só no resto de España senón tamén en moitos lugares do estranxeiro, “achega valores únicos” que ademais de fomentar a arte nos espazos urbanos, crea un produto turístico propio da cidade de Ferrol.
Segundo manifestou a directora de Turismo de Galicia, a orixinalidade coa que se trata a obra de Velázquez no barrio de Canido, en Ferrol, vén complementar tamén de xeito moi especial a oferta turística da cidade, o que fai moito máis atractiva a visita dos turistas.
Por outra parte, referiuse á recuperación turística de Galicia, segundo os últimos datos do mes de xullo que acreditan que a comunidade galega recibiu un 80% de viaxeiros máis en relación ao ano 2020.
A esta recuperación turística, engadiu a directora de Turismo de Galicia, tampouco é allea a cidade de Ferrol que se se situou por enriba dos niveis do pasado ano –concretamente cunha suba do 67% no volume de noites- e tamén superou os niveis de 2019 –nun 3,5% o número de pernoctacións como consecuencia dunha notable mellora da estadía media De feito, o volume de viaxeiros aloxados nos establecementos hoteleiros de Ferrol, a capacidade de recuperación fica próxima ao 80% do nivel de 2019.