A Xunta colabora co concello do Cervo na mellora das pistas de padel no campo de fútbol da Veiga

A directora xeral de Administración Local, Natalia Prieto, visitou hoxe xunto co delegado territorial da Xunta en Lugo, Javier Arias Fouz e o alcalde de Cervo, Alfonso Villares as obras realizadas nas pistas de padel no campo de fútbol da Veiga, ao abeiro da Orde de Infraestruturas de uso público, cun orzamento de preto de 40.000 euros
Natalia Prieto explicou que o proxecto consistiu na cuberta e cerramento de pistas de pádel no campo de fútbol municipal da Veiga, polo cal estas pistas, moi demandadas na actualidade, poderán utilizarse todos os días do ano.
A Xunta financiou estes traballos no marco da Orde de infraestruturas de uso público, coa que apoia as iniciativas dos concellos galegos para a creación e/ou mellora das infraestruturas, dotacións, instalacións e equipamentos vinculados á prestación de servizos municipais.Na convocatoria deste ano, o Goberno galego mantén o orzamento de 4 millóns de euros que destinou o ano pasado a esta liña de axudas, despois de incrementalo en 2020 nun millón de euros respecto do orzamento do 2019.

O Concello de Cervo recibiu nos últimos anos máis de 1,5M euros das diferentes liñas de axudas Vicepresidencia Primeira. Tanto a través da Orde de Infraestruturas de uso público para pavimentación dos accesos ao polideportivo de Rúa, remodelación integral de rúa da Fonte, rehabilitación do ximnasio municipal anexo ás instalacións da piscina do concello; e mediante o Fondo de Compensación Ambiental, na mellora da recollida selectiva de lixo, na renovación de redes de abastecemento de auga potable,así como na adquisición de vehículos con equipamento especial destinado a actuacións de protección do ambiente e do espazo natural

A directora xeral de Administración Local destacou a importancia da colaboración entre a Administración autonómica e a local, que é a mellor coñecedora das necesidades e demandas da veciñanza, xa que grazas a estas axudas, os concellos galegos levan a cabo actuacións que repercuten en melloras directas para o día a día dos cidadáns e que non se poderían levar a cabo en moitas ocasións se non fose pola colaboración entre Xunta e concellos.