A Consellería de Emprego e Igualdade impulsará a economía social e o cooperativismo no 24º Salón da Alimentación do Atlántico, Salimat 2021
A Consellería de Emprego e Igualdade participará un ano máis nesta cita co fin de contribuír á promoción das empresas de economía social e das cooperativas galegas
Disporase un posto onde ofrecer e presentar os produtos de nove empresas do sector
O evento, enmarcado dentro da Semana Verde en Galicia, celebrarase do 3 ao 5 de setembro no recinto feiral de Silleda (Pontevedra)
O Goberno galego demostra deste xeito o seu compromiso activo ca economía social e o cooperativismo da Comunidade, sendo estes dous eidos eixos clave do crecemento e da recuperación económica
A Consellería de Emprego e Igualdade estará presente no 24º Salón de Alimentación do Atlántico, Salimat Abanca 2021, que se celebrará do 3 ao 5 de setembro no recinto feiral de Silleda, no Concello de Silleda (Pontevedra).
Co obxectivo de ofrecer e presentar os produtos de ata 9 empresas do sector, a Consellería contará cun posto institucional de Economía Social que pretende ser un escaparate para que empresas vencelladas á economía social e o cooperativismo poidan ofrecer e promocionar os seus produtos: lácteos, derivados e apícolas (Bico de Xeado, Productores del Campo de Capela, Gaia SCG); vitivinícolas (Bodegas Eidosela); cárnicos (Cogal); hortofrutícolas (Andaina Pro Saúde Mental Emprego SLU, Freshcut, Alcrique SCG) e salsas e condimentos (A Factoría do Lume SCG). Está previsto neste mesmo stand algúns petiscos dos produtos ofrecidos como son queixos, marmeladas, zumes, viños, xeados, licores e salsas.
As empresas presentes neste stand institucional contarán con persoal experto que informará e explicará a todas as persoas interesadas sobre as distintas características e peculiaridades de cada artigo presentado e darán a oportunidade aos asistentes de probar combinacións innovadoras de produtos autóctonos de calidade.
Co afán non só de promocionar os produtos propios de Galicia aquí, senón tamén alén e en aras de internacionalizar a oferta, as empresas expositoras acudirán aos Encontros Internacionais de Compradores a través de reunións concertadas que lles permitirán contactar de forma planificada con importadores de Perú, México, Reino Unido, Suecia, Portugal, Dinamarca, e Portugal, entre outros. Constitúen estes encontros unha boa oportunidade para abrir mercados no exterior, tratando con importadores con interese real nos produtos galegos.
O Executivo galego aposta deste xeito, e a través dunha presenza activa e de apoio á empresa da economía social e o cooperativismo, por este modelo de importancia non só para a economía da Comunidade senón tamén para a diversificación e o benestar, facilitando que Galicia continúe a ter presenza nos mercados internacionais con produtos de proximidade e calidade constatada.
Imaxes relacionadas
