A Xunta formará a unha quincena de persoas en Abegondo sobre a aplicación e a manipulación de produtos fitosanitarios

A Consellería do Medio Rural, a través da Axencia Galega da Calidade Alimentaria (Agacal), organiza un curso sobre aplicador e manipulador de fitosanitarios de nivel básico. Así, unha quincena de persoas formaranse nesta acción formativa que se desenvolverá a partir do vindeiro martes día 17 na aula de informática da casa do concello de Abegondo.
A acción formativa -que contará cunha duración de 27 horas - centrarase en que os agricultores consigan unha formación adecuada para realizar tratamentos fitosanitarios nas súas explotacións sen emprego de persoal auxiliar e, á súa vez, en capacitalos para obter o carné de aplicador de nivel básico, necesario para exercer esta actividade a nivel autonómico e estatal.
Así, os contidos da súa programación tratarán temas como os produtos fitosanitarios e os métodos de transporte, almacenamento, manipulación e aplicación, así como os riscos derivados do seu uso tanto para o medio ambiente e para as persoas, xunto cos equipamentos e EPIs (Equipos de Protección Individual) axeitados para o seu emprego. Do mesmo xeito, trataranse cuestións como as pragas dos cultivos e as técnicas adecuadas para o seu control.
A Agacal ten como obxectivo mellorar a produtividade e a xeración de valor engadido no rural a través da organización de cursos coma este, que se enmarcan no plan de formación continua 2021. Deste xeito, búscase potenciar a remuda xeracional para consolidar un modelo produtivo sólido e sustentable do agro galego.
Cabe engadir que os interesados poden consultar todas as accións formativas e de transferencia organizadas pola Consellería do Medio Rural neste ano 2021 no seguinte enlace: https://ovmediorural.xunta.gal/gl/consultas-publicas/accions-formativas.