Ethel Vázquez demanda axilidade no impulso do tren a Punta Langosteira para poder avanzar na recuperación da fachada marítima

A conselleira de Infraestruturas e Mobilidade, Ethel Vázquez, demandou hoxe ao Goberno de España axilidade no impulso do tren a Punta Langosteira para poder avanzar na recuperación da fachada marítima da Coruña.

Ethel Vázquez e o delegado territorial da Xunta, Gonzalo Trenor, mantiveron esta mañá un encontro de traballo co presidente da Autoridade Portuaria da Coruña, Martín Fernández Prado, no que analizaron conxuntamente a situación e o futuro do Porto.

Ethel Vázquez remarcou que para a Xunta a conexión ferroviaria de Punta Langosteira é a prioridade número un en relación co Porto da Coruña, xa que sen esta infraestrutura, non se pode garantir a viabilidade da dársena, nin pode haber traslado de operadores nin se poden liberar os peiraos interiores para recuperar a fachada marítima.

Salientou que o presidente da Xunta conseguiu o pasado mes de marzo o compromiso expreso do ex-ministro Ábalos coa conexión ferroviaria de Punta Langosteira. Ese compromiso foi ratificado no mes de abril, cando o Ministerio de Transportes tamén confirmou o seu financiamento con cargo aos fondos europeos de reconstrución, como viña defendendo o Goberno galego, ademais da súa intención de licitar as obras no pasado mes de xullo algo que, segundo lembrou Ethel Vázquez, non se puido cumprir.

A titular de Infraestruturas e Mobilidade instou ao Ministerio de Transportes a proceder coa máxima axilidade para licitar, canto antes, o tren a Langosteira e aproveitar a oportunidade que supoñen os fondos Next Generation para construír esta infraestrutura “imprescindible” para a cidade da Coruña.

Nesta liña, destacou a disposición do presidente da Autoridade Portuaria da Coruña de traballar de forma intensa, en coordinación co resto dos organismos implicados, para que a conexión ferroviaria do porto exterior se materialice nos prazos establecidos polos fondos europeos. Agradeceu, concretamente, o esforzo que está a facer a Autoridade Portuaria para axilizar ao máximo os trámites que lle corresponden, iniciando, o pasado luns, o proceso de expropiación dos terreos necesarios para a execución do tren.

Ethel Vázquez confirmoulle ao presidente da Autoridade Portuaria a vontade da Xunta de asistir á xuntanza convocada por esta institución para abordar o acordo sobre a fachada marítima co Concello da Coruña.

Reiterou que a Xunta está aberta e disposta a negociar as porcentaxes concretas de participación na adquisición dos terreos portuarios desde unha postura de total flexibilidade, xa que o único que quere o Goberno galego é que o Porto da Coruña teña un futuro viable e competitivo e que a fachada marítima sexa un espazo público ao servizo da cidade.

Aquí, cómpre lembrar a necesidade de que o Goberno municipal da Coruña procure o consenso político no propio Concello sobre o futuro do Porto, xa que sería difícil de entender que se tente pechar un acordo coa Xunta sen ter pechado antes un acordo coa cidade.

A este respecto, Ethel Vázquez expresou a confianza en recibir tamén confirmación por parte do Concello da súa asistencia á xuntanza proposta pola Autoridade Portuaria e atopar “unha boa disposición ao acordo pola súa banda”.